India nulate an champion

Pathianni zan khan Navi, Mumbai-a DY Patil Stadium -ah ICC Women’s Cricket World Cup 2025 final khelh a ni a. Ruahsur in darkar hnih chuang zet a tihkhawtlai final-ah hian India chuan run 52-a South Africa hnehin World Cup-ah a vawi khat nan an champion.
Entu mipui 45000 zet pungkhawm hmaah final ropui takah India in an vaw hmasa a, an chetha thawkhat viau. India tan hian Shafali Verma chuan ball 78 a hmachhawn atangin run 87 zet a siam a, bul a tan tha hle. Inelna thlengtu India tan hian Deepti Sharma chuan run 52 siamin Shafali a thlawp tha viau bawk. India hian over 50 chhungin run 298 an siam a, mi pasarih an out. Run 298 hi South Africa tan targer hautak pangngai a ni a, India tan champion theihna hun tha a inhawng.
South Africa vuak hun a thleng a, an che chhe bik lem lo. Captain Laura Wolvaardt chuan ball 98 a hmachhawn atangin run 101 zet a siam. An khingpuite khel chhe lo mah se India tan ball vawmtute an chetha a, Deepti Sharma chuan run 39 chauh pein mi panga a vawm out ICC Women’s Cricket World Cup 2025-ah player tha bera thlan Deepti Sharma hian World Cup khelh chhungin match 9 a khel a, Wicket 22 ngawt a la a, a chetha hle. World Cup-ah a vawi khat nan an champion theih nan a thawhhlawk viau a, player tha bera thlan awm reng a ni.
South Africa hian champion ngei tumin tan an khawh a, India run khawl sa an hnaih hmen hle. Over 10 la awmah run 88 chiah an mamawh a, four leh six run an vawchhuak tam thei a nih chuan champion theihna hun tha tak an nei. Mipui thahnem tak, champion chaka tuihal hmaa India hi boruak sang takin a delh a, an ball vawmtu te an zam hman hle nghe nghe. India tana ball changtute pawhin an man duh hleithei lova, South Africa an him hram hram zel.
Champion chaka tuihal India hian an nawr tawm hret hret a, mi pakua an vawm out tawh. Hun pawimawh takah Captain Harmanpreet Kaur chuan nalh leh chiang zetin ball kang a man a. South Africa chu over 45.3-ah run 246 siamin an out vek a, India chu World Champion an ni zui ta a ni.
Cricket World Cup-ah a vawi khat nan an champion tuma India captain Harmanpreet Kaur hi Kristian nula a ni a, tournament chhungin a tawngtai nasa a, inkhel zawhah Pathian hnenah lawmthu a sawi thin bawk. Sakhaw mi tak a nihna hian ngaihsan a hlawh hle a. India a champion pui vangin lawmpuitu an tam viau bawk.