Mahni samzai zat hre thei an awm em? Awm e!

Mahni samzai zat hre thei an awm em? Awm e!
Mahni samzai chhiar thei tumah an awm lo ang kan ti thin kha a nia, mahse, hei hi a chhiar theih leh chhiar peih an awm ta tlat mai! Pa pakhat chuan a lu ziat kawlhin, a samzai zawng zawng a chhiar!
A hming tarlan a ni lo, mahse, a Instagram chu CountryMan tih a ni a, a samzai chhiar lai video a IG-ah a dah chuan entu a ngah khawp mai, reilote chhungin maktaduai 14-in an en hman. A samzai a chhiar dan chu maw, a sam a tihuh hmasa a, trimmer-in lu a ziat kawlh a, a samzai chu a dah khawm a, a mal te tein a chhiar ta ngat ngat mai a ni.
Ni nga chhung, nitin darkar 10-12 chhung a chhiar ngat ngat a, a chhiar zo. Samzai sang khat a chhiar tlin apiangin a chhinchhiah nan lungte pakhat a dah zel a ni. A ni hnihnaah hetiang hi tuman an la ti ngai lo tih a hrechhuak a, record siam theihna tur a nih beiseiin, a chhiar tha leh a, a chhiar lai a record ta a ni.
Limca Book of Records leh Guinness World Records-ah email thawnin, record siam a tum hi a hriattir a, mahse, Limca Book of Records chuan a record siam tumna hi an hnawl sak a, GWR pawhin application atan dollar 1,200 (Rs 1,03,000 vel) an phut a, mahse, pawisa chawi ai chuan tiin record siam tum chu a bansan ta zawk.
A samzai chhiar hi 1000 zelah lungte pakhat a dah zel a, a tawpah lungte 91 a awm a, a chhut dan chuan a samzai zawng zawng chu 91,300 a ni ta a ni.