Mallikarjun Kharge an sorkar hmalakna sel

Central Bureau of Investigation (CBI) chu railway accidents ni lovin crime chhui tur a ni, tiin Congress president Mallikarjun Kharge chuan Prime Minister Narendra Modi hnena lehkha a thawnah a sawi a. Hei hi Centre-in Balasore train accident chu CBI ten an chhui ang a tih hnuah a ni.
Congress-UPA sorkara Railway Minister ni tawh Kharge chuan phek li a chhah lehkhathawnah point 11 tarlangin ‘thiamna mamawh pawh nei lo agency dang dah luh leh hian sorkar hian systematic safety buaina chinfel ai chuan rilru lakpenna lam bawk a kalpui leh a ni’ tiin a sawi.
“CBI emaw law enforcement agency dang te hian technical, institutional leh political failure awma accountability chinfel theihna an nei lo. Railway safety-ah technical expertise an nei hek lo,” tiin Congress chief chuan a sawi.
Congress chief chuan kum 2016-a Kanpur-a rel chesuala mi 150 in nunna an chan phahnaah pawh khan chhui chian hna chu National Investigation Agency (NIA) te hnenah a hlan tawh a ti bawk a.
“Nangmah ngeiin kum 2017 a election rally neihnaah ‘phiarrukna’ a awm i ti a” tia sawiin, “Ram pumin hremna na tak lekkawh ngei a beisei laiin kum 2018 khan NIA chuan an investigation kharin chutah chuan chargesheet pawh an siam lo a nih kha. Tun tlengin mi 150 thihna chhanah tu nge mawhphurin ramin a la hre lo?” tiin Kharge chuan a sawi bawk.
Railway Minister Ashwini Vaishnaw an ‘a him tia a chhal’ tin te chu a him lohzia lailanin a awm ta, tia sawi bawkin sorkar hian he chetsualna thlen chhan dik tak hi a lailang ngei tur a ni a ti bawk a. “Vanduaithlak takin, aiawhtute – nangmah leh Railway Minister Ashwini Vaishnaw ngei pawhin harsatna a awm inpawm duh lo,” tiin a sawi bawk.
Railways chu ‘nu hrawn’ enkawlna hnuaiah dah a ni tia sawi bawkin Kharge chuan passenger te himna lamah tlakhniamna nasa tak a thleng mek a, sorkar hian he chetsualna chhan dik tak hi a hrefiah ngei tur a ni a ti bawk.
Congress chief Mallikharjun Kharge chuan Railway Budget leh general Budget suihfin chuan nghawng chhia a neih thu sawiin rail safety chungchangah pawh sorkar chuan Comptroller and Auditor General (CAG) leh parliamentary panel report te pawh a ngaihsak lo tiin a sawi bawk.