Mizoram deputy govt. chief whip Lalrintluanga Sailo, MLA chuan Ningani khan Project Pushpak (BRO) chief engineer nen inkawmin an hnuaia awm Mizorama project hrang hrang leh Mamit district-a kawngpui chhia siamtha rang turin a sawipui.
Chief engineer leh a hote hian an hnathawh mekte slide projector hmangin an project neih leh kalpui mekte lo an lo hrilhfiah a. Deputy govt. chief whip pawhin Project Pushpak-in Mizoram tana hmasawnna hna an thawhna kawngah tanpui theihna a neih chuan puih a inhuam thu a hrilh.
Dapchhuah leh W.Phaileng inkar kawng chu BRO hnuaia thawh tur a nih angin leh Marpara/Silsuri leh Tuipuibari lama khaw hrang hrangten an mamawh an lamna hmun kawng intawm pawimawh tak a nih avangin ngaipawimawh lehzual a, helai kawng infinna lai hi khawih hmasa thei se a duh thu a hrilh a. BRO hotute hian helai kawng pawimawhna hrethiamin kumin working season chhunga thawh zawh hman an tum thu an lo hrilh a ni.
Project Pushpak hotute chuan Mizorama border area road, tunhmaa an kuta awm thin leh tun thlenga la awm rih lote pawh Mizoram sawrkarin an kuta a dah duh phawt chuan thawh an inhuam thu Lalrintluanga Sailo hi an lo sawipui a. Dampa bialtu MLA hian a bial chhung Pukzing leh Silsuri inkar via Hnahva khua kawng hi border fencing road mai niin, tuma kuta awm a nih rih loh thu a sawi a; Project Pushpak hotute hian helai kawng hi Mizoram sawrkarin rem a tih chuan khawih an inhuam tih an lo hrilh a ni.
Mamit district kawng siamtha turin BRO hotu hnenah thlen
Get real time updates directly on you device, subscribe now.
Prev Post
Next Post