Manchester City an chak fai vek

English Premier League (EPL) season tharah manager thar nena inlan Manchester City an khel tha chhunzawm zel a, vawi nga an khel tawhah an la chak fai vek. Pathianni zana inkhel hmuhnawm tak; goal 8 ngawt luhna inkhelah City hian 5-3 a Sunderland hnehin table chung ber an luah.
Etihad Stadium-ah Manchester City leh Sunderland ten inkhel hmuhnawm tak an lantir a, goal hmangin an inchhang tawn zak zak. Mikhual team Sunderland in goal an chhuah hmasa a, Brian Brobbe goal hmangin an si phurh sut ve zel bawk mah se si hnih erawh an sut zo thei ta lova, City lakah uiawm takin an tlawm. Inrinni zanah champion lai an tlawm vanga chak ngei tum City hian an mualah bul an tan tha viau a, goal pawh an thun hma hle. Inkhel tan atanga minute 9-na lekah nipui bazarah manto taka an lak luh Enzo Fernández chuan pui taka free-kich chhuih goal in hmahruaina goal a thun.
City tana Enzo goal thun hmasak berin Enzo Maresca team te phur viau mahse an phur rei lo hle. Sunderland hian fuh zetin an khingpuite an nawr a, Enzo Le Fee ball pek fing tak dawngtu Brian Brobbey chuan fim takin a pet goal a, minute 12-naah an si phurh a sut. Manchester City leh Sunderland te inkhel tum hian ‘Enzo’ tih hmingpu an langsar hle. City manager Enzo Maresca-a’n a team a chakpui a. City goal hmahruai kha Enzo Fernandes thun niin Sunderland goal hmasa ber pawh Enzo Le fee siamsak a ni ve bawk.
Hma taka goal hnih a lut hian inkhel a tihmuhnawm leh zual a, goal thun tumin an innawr tawn nasa hle. Mikhual team Sunderland in ball an inpek fuh tawk loh an tuar a, City in an nawr bet. Sunderland ball thenfai theih loh hi Rayan Cherki chuan leihrulah awlsam takin a pet goal a, minute 29-naah an goal hnihna a thun. Hnufual nawn leh bawk mah se Sunderland an zam lova, an buai hek lo. Huaisen taka inlan chhunzawmin City tlarhnung an thiat chiang hle. Chiang zeta City tlarhnung thiata an tihmualpho hnuin an goal khatna thuntu Brian Brobbey chuan Meunier siamsak tha zet chu awlsam takin a pet goal a, minute 33-naah an si phurh a sut nawn leh.
An inhnehtak thar leh vangin inkhel boruak a nung tha viau a, goal thun tumin thapui an thawh dun nasa viau. Chak tura rinkai zawk leh player pawh nei hrawl zawk Manchester City an che fuh hmasa nawn leh. Box chhunga buai deuh nuaih nuaih karah Antoine Semenyo chuan goal thun theihna hun remchang a nei. Semenyo hian lei hrulah kawh zetin a pet lut a, chawlhlawk dawn hnaih minute 43-naah hma an hruai nawn lehna goal a thun a, 3-2 a hmahruai chungin chawlhlawk an hmang ta nge nge.
Chawlhlawk hnu lamah inkhel a hmuhnawm chhunzawm a, goal thum ngawt a luh belh leh. |um thum ngawt goal thun hmasa zawka tang City in hmahruai fal ngei tumin tan an khawh a, chawlhlawk hnu lamah goal an thun belh thuai. An goal thumna thuntu Antoine Semenyo chuan Sunderland tlarhnung chetsual a hrem a, lei hrulah awlsam taka pet goal in minute 57-naah an goal lina a thun a, an hmahruaina a tizau leh zual.
4-2 ngawta hma an hruai vangin Manchester City dinhmun a tha a, an player te pawh an thlamuang khat viau tawh. Dinhmun chhe zual zawkah ding mahse Sunderland in an huaisenzia an lantir nawn leh a, goal hnih thun tawh Brian Brobbey chuan minute 59-naah goal thunin an si phurh a sut then leh a. Brian Brobbey hian team lian City lakah goal thum a thun a, goal thunah lungthu a kim hial nghe nghe a ni.
An inkar zim nawn leh mah se City goal thun khawl Erling Haaland chuan hun tawp dawn hnaih minute 81-naah an goal ngana thunin an hmahruaina a tizau nawn leh a, hmun himah an team a hlangkai. Haaland goal thun hnuin goal dang a luh belh tawh lova, inkhel hmuhnawm takah Manchester City chuan 5-3 in hnehna an chang ta a ni.
City hian season tharh vawi 5 khel tawhin an la chak vek a, table chung ber an luah nghet.