Manipur-a remna awm theihna’n Manipur thleng ke in kal dawn

Manipur-a remna awm theihna’n
Manipur thleng ke in kal dawn
Manipur-a buaina awm meka remna awm se a duh zia lantirna atan Lalbiakthanga, Lawipu Veng Aizawl chuan Aizawl atangin Manipur thleng ke in kawng a zawh dawn.
Nilaini zing dar 7.00 khan Lalbiakthanga hian Vanapa Hall kawt atangin a kawng hi a zawh tan a, amah vailiamtu MJA Gen. Hqrs. president C Lalrambuatsaiha chuan Pu Lalbiakthanga thupui remna leh muanna chu a ropui hle, tiin, inhmangaih tlanga khawsak ho dial dial duh mi a ni chu a entawntlak hle tih a sawi. Hun hmasa lama chhan tha tak neia kawng a lo zawh tawhnaah fakawm a tih thu sawiin, tun tuma remna kawngzawh a nei tur chu tluang taka a kal theihna’n duhsakna a hlan tih a sawi a ni.
Kum 2021 khan Lalbiakthanga hian Burma tualchhung buainaah remna leh muanna awm leh se a duh zia lantirna atan leh mipui thlan sawrkar ‘democracy’ tundin leh theih a duhna lantirin, Aizawl atanga Zokhawthar thleng ke in kawng a lo zawh tawh a. Kum 2022 khan India zalenna hmuh champha vawi 75-na denchhenin Mizoram khawpui hrang hrang chhim leh hmar chhak leh thlang ke in a lo fangchhuak tawh bawk.
Ruahman ang chuan nizan khan Lalbiakthanga hian Tuikhurhlu ah riah a tum a, Churachandpur thleng a kal hnu ah boruakin a zir chuan Imphal thlen a tum a ni.