Manipur-ah AFSPA hmang leh dawn

Manipur-ah AFSPA hmang leh dawn
Manipur-ah chuan police station 13 huam chhung tih loh hmun dang zawngah Armed Forces Special Powers Act (AFSPA) hman zui tur a ni a, hriattirna hi Pathianni khan Ministry of Home Affairs (MHA)-in a chhuah.
AFSPA hi Arunachal Pradesh-a Tirap, Changlang leh Longding district leh police station pathum huam chhungah thla ruk chhung atan hman a ni leh dawn tih ministry hian a sawi bawk.
Manipur hi Chief Minister N Biren Singh-a a bân hnuah February 13 atang khan President’s Rule-a awm mek niin assembly pawh che thei lova awm mek a ni bawk.
Singh-a hian BJP kaihhruai Manipur sorkar hi kum 2017 atang khan a kaihruai a. May, 2023 atanga an state-a chi leh chi inkara buaina a chhuah hnu thla 21 dawn, mi 250 chuang an thih hnuah chief minister atangin a bâng a ni.
AFSPA hi Manipur-ah hian kum 1980 chho atanga kalpui tan a ni tawh a. He dan hnuaiah hian sipaite chu ‘ram buai huam chhungah’ thuneihna sang tak pek an ni a. Sipaite thuneihna a san avang hian duh lotu pawh an tam hle thin.
Hetih lai hian Inrinni khan venhim hna thawktute chuan Manipur-ah hian tlangram leh phaizawla hmun rinhlelhawm laiah mi dap leh zawn beihpui an thlak tih ANI chuan a tar lang.
Venhim hna thawktute hian ralthuam leh a kaihhnawih thil tam tak an man.
“Tualchher rifle, Bolt Action Rifle, .22 pistol, tualchher mortar (Pompi-6 ft.), tualchher mortar (Pompi-5 ft.), tualchher mortar (Pompi-4 ft.), tualchher hand grenade, helmet, wireless set, wireless set charger, HE Bomb, 5.56 mm mi thahnem tak, 7.62×39 mm mu ruak 12, 7.62×45 mm mu ruak pali leh gun powder gram 500 chu Thangjing tlang ngawah hmuh chhuah a ni,” tiin Imphal Police chuan thu an chhuah.