Manipur-ah buaina a reh thei lo, lirthei leh khua hal

Manipur-a Imphal East district-ah telecom bungraw phur lirthei chu dan phal lo thil phurh nia sawiin Ningani khan lungawi loh lantirtuten an hal niin police-ten an sawi.
Police chuan telecom bungraw phur lirthei hi Kangpokpi district-a Saikul lam pan a ni tih an sawi a. Amaherawhchu, Imphal East-a Dolaithabi Dam-a venhim hna thawktuten lo tidingin dan leh thupek thil avangin kir leh turin an hriattir.
Imphal an pan lehna kawngah hian Imphal East-a Pukhao Ahallup-ah lungawi lohna lantirtu pawl pakhatin an lo dang a. Zing dar 1.30 vel khan dan phal loh thil phur a nih thu sawiin an hal ta niin officer-te chuan an sawi.
Police team kalin boruak thunun zui thei mah se lirthei erawh a kang chhe hman thung.
Sagolmang Police Station-ah thubuai ziah luh a ni a, a inhnamhnawihte hriat tumin an chhui mek.
Tual chhung mite chuan Saikul panin zu, vaihlo kaihhnawi leh thil dang, dan phal loh phur lirthei tam tak an kal thin tih an sawi.
Superintendent of Police (Imphal West) Ksh Shivakanta-a’n venhimna kalpui dan kaihhnawiha sorkar thupek a tihchhuahah Manipur Police bakah Central Armed Police Forces (CAPF) te chu Ningani khan Kanglatongbi Bridge bula Namduilong-ah special duty turin dah an ni tih a tar lang.
Naga Liangmai pawlten Imphal West district-a Namduilong-ah National Highway-2 (Imphal-Dimapur) an dang mek a. A chhan let nan Sadar Hills Kuki-Zo pawlte hian Thawhlehni atang khan Kangpokpi district-a Gamgiphai (Namduilong bul)-ah national highway-a zalen taka kal phutna an lantir bawk.
Hetihlai hian vantlang huap pawl, Kangleipak ​​Kanba Lup (KKL) chuan Prime Minister Narendra Modi hnenah memorandum thehlutin Manipur buainaa inrawlha a tul anga hma la turin a ngen.
KKL hian May 3, 2023 atanga buaina chhuakte a tar lang a, tun hnaia Konsakhul-a Liangmai Naga civil mi paruk thah an nih thu a tar lang bawk.
Memorandum-ah hian November 11, 2024-a Jiribam district-a thil thleng, hmeichhe pathum, naupang pathum leh naute pakhat rukbo an nih thu thu leh Barak luiah an ruang chhe tawh hmuh a ni tih an sawi.
Memorandum-ah hian Manipur buaina kaihhnawih thil thleng zawng zawngte chu duhsak bik nei loa chhui chian a phut a, Indian sorkar chu inrawlha state chhunga thil awm dan pangngai siam leh turin a ngen bawk.
Tharum thawhna hi Naga leh Kuki inkara inruk bona nia sawi a awm leh hnuah a chhuak thar leh a. May, 2023 atang khan hnam hrang hrang inkara tharum thawhna hi a awm fo tawh a, hnam hruaitute, lal pawl, kohhran, mi dangte leh sorkar chuan buaina tihtawp tumin hma an la reng a, a sawt tak tak rih lo.
May 13-a inlambunna pahnih thleng avangin Naga-Kuki buaina a zual thar a, mi pali thi zingah kohhran hruaitu pathum an tel a. Hemi hnu hian mi 48 man an ni tawh a, national highway pathum dan a ni.
State Home Minister Govindas Konthujam chuan Kuki leh Naga mite ruk bo an nih thu a sawi a. May 15 khan Kuki leh Naga 14 ruk bo mi 14 ve ve chhuahtir an ni a, United Naga Council chuan Naga paruk man an la nih thu a sawi a, venhim hna thawktuten a zawn hna an thawk zui a. Mi parukte hi sorkar nena inkahhai thuthlung ziaktu hel pawl, Kuki National Front kutah an awm nia sawi a ni a. Hetih lai hian Kuki pawlte pawhin an mi 14 hren an la nih thu an sawi ve bawk.
Hetih lai hian a Kamjong district-ah Nilaini khan tharum thawhna a thleng bawk a, Myanmar ramri bula khaw eng emaw zat hal a ni a, hei hian tlangram district boruak tang sa takah buaina nasa zawk tak a tihchhuah hlauhna a siam.
Kuki tamna khua pakhat leh Tangkhul Naga khua pahnihin kangmei hi an tuar a, in eng emaw zat hal a nia sawi a ni a, finfiahna chiang tak erawh a awm thei lo.
He thil thleng hian Kuki leh Naga pawlte inkara inpuh tawnna a siam nghal a, a tituah an inpuh tawn.
Naga khuaa thuneitute chuan ram dang nena inrina bula Tangkhul Naga khaw pahnih, Kongkan Thana leh Shangkalok-a in halnaah hian Kuki ralthuam keng pawl, Kuki National Army-B (KNA-B) te chu mawhphurtuah an puh a. Pawikhawihna hi a ruala tih a nih thu an sawi a, Kuki pawlte chu an biala buaina tizualtuah an puh.
Him nan sipai tha tawk dah vat an phut a, remna siam leh civil mite chenna hmun beitu mawhphurtute lakah na taka hmalak an phut.
Kuki Inpi Manipur (KIM) pawhin chuan Phaimol khua chu Myanmar atangin ralthuam keng pawl, Shanni Nationalities Army (SNA) leh NSCN-IM ten an bei niin an sawi ve bawk a. In 20 a kang ral vek tih sawiin khuaa chengte an tlanchhiat vek phah niin an sawi.
Manipur-a hnam inkara buaina hi Meitei leh Kuki inkara intan a ni a, hnam hrang hrang an tel zui a. May, 2023 atanga Meitei leh Kuki-Zo buainaah hian mi 260 vel an thi a, mi 60,000 vel chu hmun himah an tlanchhe bawk.
Meitei hi Hindu an ni a, an tam zawk chu Imphal Valley-ah an cheng a ni a. Kristian tam zawkna, Kuki hi tlangah an cheng ve thung.