Manipur Assembly Session ni khat awh engmah sawihona nei hman lova tihtawp zui nghal a ni

Manipur Assembly session ni khat awh chauh neih tur chu tan a nih phat hnuah Congress MLA rual tena session chu ni nga chhung neih tura pawhsei ni se tia an ngiat avanga harsatna an siam avangin tihtawp zui nghal a ni.
Opposition MLA leh chief minister hlui ni bawk Okram Ibobi Singh kaihhruai Congress te chuan ni khat chauh chu buainain a chim mek Manipur buaina sawiho nan a tawk lo an ti a ni.
Assembly session-ah hian Kuki MLA 10 te chu pakhatmah an kal lo bawk a.
Session chhun dar 11-a tan niin Meitei leh Kuki inbeihna May 3 atanga intan avanga nunna chan te sunna hun hman a ni hmasa a.
Chief Minster N Biren Singh chuan, “Buaina avanga nunna chan te kan sun takzet a ni. Tun an ghun harsaah hian an hmangaih chante hnemna tur tawngkam tawk a awm thei lo,” tiin a sawi a. house chuan inbiakna leh remna kawng hrang hrang zawngin communal harmony a awm theih nana hmalak ni se an ti zui bawk a.
House chuan Chandrayaan-3 in Thla leilung a tum avanga lawmawm tiin fakna thu an sawi a, scientists N Raghu Singh, Manipur chhuak leh ISRO team a tel chu lawmpuina an sawi bawk a.
Chumi hnu lawk chuan Congress MLA te chu au zuiin “Nuihawhna tihtawp ni se, democracy humhim ang” tiin an auzui a, session chu Manipur state dinhmun sawiho nan ni ngaa pawhsei ni se tiin an ngiat zui a ni.
Speaker Th Satyabrata Singh chuan opposition MLA te chu thu tura tiin mahse buaina an siamzui zel avangin House chu minite 30 atan a titawp lailawk phawt a.
House thutkhawm tan a nih leh hnuah Congress MLA te chu auzui zelin Speaker chuan buaina leh harsatna siam chung chuan house kalpui ngaihna a awm lo tiin tiamchin awm lovin a titawp zui ta a ni.
State sorkar chuan thla kalta khan session chu August 31 a nieh tur a lo ti tawh a, mahse, Raj Bhavan atangin engmah pawmpuina a dawn loh avangin August 28-ah a sawn leh a ni. Kar kalta khan chief minster’s office chuan session chu August 29-a neih turin a puang zui a.
Assembly session neih hnuhnun ber chu March thla kha ni tawhin session hi thlaruk dana neih ngei ngai a ni a.
Committee on Tribal Unity (CoTU) leh Indigenous Tribal Leaders Forum (ITLF) te chuan session neih chu hun lo an tih thu sawiin Kuki-Zo MLA te tan tel ve a hlauhawm an ti bawk a.
Pathiannia thuchhuah intawm an siamah law and order in awmzia a neihloh a, state sorkar in a mipui te leh official te pawh a venhim theih loh laia session neih chu awm ang lo tiin an sawi.