Manipur atanga chhuak, Mizoramah haw

India aiawha football khelin foreign-ah a chhuak a,
Manipur atangin inkhel tur hian a chhuak. Thla khat vel a thang bo chhungin a khawvel a lo inthlak dawrh a, Manipur atanga chhuak kha Mizorama a haw a ngai ta.
Thanglalsoun Gangte a ni a, AFC Under 17 Cup, Bangkok-a khelhah India ram aiawhin a tel. Chumi hma chuan Germany-ah an inbuatsaih a, a chhungte a kalsan vang vang. Chumi chhung chuan a chunga thleng ngai lo tura a ngaih a chungah a thleng a, an inah pawh a haw thei ta lo.
Zo hnahthlak tlangval Thanga te chhung hi Imphal-a cheng an ni a, inkhela a zin lai hian Imphal-a an in chu Meitei-in an lo hal. A chhungte an tlanchhia a, Aizawlah an awm mek. Aizawla a chhungte chu Thanga pawh hian a fin ve mai a ngai dawn a, Bangkok-a an inkhel zo hi Thawhtanni hian Aizawla “haw” a tum.
Thanga chhungte hian May ni 4 khan Imphal-a an chenna in an chhuahsan a, an sahimna zawngin Mothung khuaah an tlanchhia. An tlanchhiat hnu May ni 7-ah an in chu Meitei-in an hal a, a kang fai. A kang fai tihah, bungrua chu a haltute hian an la!
Mothung khua atang hian khaw dangah an kal a, chuta tangin Dimapur-ah, chuta tangin Silchar-ah, Silchar atang chuan May ni 14 khan Aizawl an lut. Chung chu India ram tana theihtawp a chhuah laia thil thleng a ni.
An in tihchhiat a nih lai hian an team hi Germany-ah an awm a, an in an tichhia a ni mai lo, a patea (a pa nau) a boral – Manipur buainaah Meitei-in an that!
Thanga hi a chhungte’n an chanchin an hrilh thei lawk lo a, Manipur-ah internet tihtawp a nih avangin zualko thu te, an in a kan ral thu te, an tlanchhiat thu te an hrilh thei lawk lo. Delhi-a an chhungte’n an lo hrilh chhawng a, chu chanchin ngaihnawm lo tak mai chu Thanga chuan ral atangin tlai khawhnuah a lo hre ve ta a ni.
“A shock khawp ang, mak a ti ang. Kan chanchin a hriat hian a tap em ka hre lo a, shocking chu a ti ang,” Thanga pa chuan a ti a, “Mission neia kal a ni a, a tih tur chu a ti thei ang ang a, theihtawp a chhuah ang,” a ti bawk.
Thanga pa hi Moia Gangte a ni a, a nupui leh Thanga nau palite nen Aizawlah an sahimna zawngin an awm mek.
Mahni inah a fapa a haw thei lo tur chu hrehawm a tih thu a sawi a, “Imphal-a hawna tur a nei tawh lo a, a tan Imphal-a haw ngaihna a awm tawh lo,” a ti a, “Ama tan pawh Imphal-a haw loh hi a tha zawk, a himna ngaihtuahin Imphal-a haw chi a ni lo,” a ti bawk.
Mizoram nuam an ti a, “Mikhual kan ni lo,” a ti. “Pathian chungah kan lawm em em a, Mizoram mipuite chungah kan lawm,” a ti a, “Unau kan ni a, Zo hnahthlak kan ni tih hi a chiang. Hetah kan unaute hnenah kan awm a, mikhualah kan inngai lo,” a ti.
An awm zel dan tur an hre bik lo a, Imphal-a an ina haw ngaihna a awm rih lo. “Pathian hnenah kan tawngtai a, Pathian hnena tawngtai hi kan tih theih awm chhun a ni,” a ti.