Manipur-a Zo hnahthlakte leh Meitei inepna chungchanga lungawi lovin Inrinni khan Churachandpur-a Zo hnahthlakte’n kawng an zawh a; kuang an zawn a, ngawi rengin km 3 vel an kal.
Churachandpur district-a Zo hnahthlak chi bil hrang hranga zirlai pawlte chu Joint Students Body tia inthlungkhawmin lungawi loh lantirna hun hi an huaihawt a, mi nuai khat dawn an tel nia sawi a ni.
Churachandpur atanga thu dawn danin, Manipur buaina kal meka nunna chan Zo hnahthlakte sun nan kuang 100 vel siamin kawng an zawhpui a, kuang ruak hi tlawmngai pawlte’n an zawn a ni.
Kawngzawhah hian Pastor rualin hma an hruai a, an hnungah nuhovin an zui. Chumi dawtah chuan kuang zawntu tlawmngai pawlte an kal a, an hnungah mipuiin an zui a ni.
Kawng tluanin kawng sirah mipui an lo ding bawk a, thawmhnaw dum inbelin an lungawi lohzia lantirin ngawi rengin kawng hi an zawh a ni.
Churachandpur Medical College atangin kawngzawh hi an tan a, Tuibuang-a mini secretariat complex an thleng. Complex-ah hian kuang hi an dah a, pangparte an dah bawk.
Zo hnahthlakte leh Meitei te inbeihnaah hian mi engemaw zatin nunna an chan tawh a, nunna chan zat hi hriat tak tak theih a ni rih lo. Meitei lam hi Manipur sorkar hotute kaihhruai nia ngaih an ni a, Zo hnahthlakte nena ralthuam hmanga an inbeihnaah pawh a phenah Manipur Police an awm tih chu Zo hnahthlakte hmuh dan a ni.
Zo hnahthlak lungawi lote’n kuang zawn chungin kawng an zawh
Get real time updates directly on you device, subscribe now.
Prev Post
Next Post