Manipur atanga raltlante puihna tur sum la dawng lo

Mizoram sorkarin Manipur atanga Mizorama tlanchhia Zo hnahthlakte tuamhlawmna tur sum sorkar laipuiah a dil a, mahse vawiin thlengin tihhlawhtlin a la ni lo.Mizoram sorkar hian Manipur a\anga Mizorama raltlan (internally displaced people) te tuamhlawm nan hian sorkar laipui-ah cheng vaibelchhe 10 a dil a, May ni 29 khan chief minister Zoramthanga’n prime minister hnena a thlen bakah, hemi ni vek hian union home minister Amit Shah hnenah Mizoram sorkarin lehkha a thehlut bawk. Vawiin thlengin chhanna hmuh a la ni lo.
Home secretary H Lalengmawia’n sum hi hmuh a la nih loh thu a sawi a, beiseina chu an nei tih a sawi bawk.
“Sum hi hmuh a la ni lo a, kan hre thuk lo a, tihian beisei chungin kan nghak a ni mai a,” tiin The Aizawl Post a hrilh a, chief minister-in prime minister hnena a thlen thu leh, minister Robert Romawia Royte-in sorkar laipui hruaitute hnena a sawi thu te, amah pawh chumi tum chuan a tel ve thu te a sawi a, mahse sum hi hmuh a la ni lo tih a sawi.
“A beiseiawm em tih te, a beiseiawm lo em tih te kan hre pha lo a. Tawngka chuan an positive a, beiseiawm turah kan ngai,” a ti a, sorkar laipui atanga thu thar hriat an neih loh thu a sawi bawk.
Manipur atanga Mizorama tlanchhiate chu state sum hmanga enkawl an nih thu a sawi a, hemi atan hian cheng vaibelchhe 5 a awm thu leh, a tul tulah hman a nih thu te sawiin, sum hman tawh dan hi district hrang hrang atanga thehlut tura inhriattir mek a nih thu te a sawi.
Supply department-in buhfai an ngaihtuah thu a sawi a, buhfai hi mamawh hmasa a ni a, sorkarin a ngaihtuah avangin, cheng vaibelchhe 5 pawh tam tham ni lo mah se indaihzai taka hman theih a nih thu a sawi a, mahse buhfai man pawh hi rulh leh tur tho a nih thu a sawi.
Manipur atanga Mizorama tlanchhia Zo hnahthlakte hi 12,492 an ni tawh a, May ni 3-a buaina a chhuah hnuah Ningani thlengin lut thar hi an la awm.