Sahuana sava bo chhanah Thawktu inhnamhnawih ring

Aizawl Sahuana sava dah bo nia sawi chu Environment & Forest department chuan police punin zawn mek a ni a. Sahuana thawktu tu emaw ber chu an inhnamhnawih rin a ni.
The Aizawl Post-in a zawhchiannaah July 1 zana dan phal loha ramdang atanga Mizorama tawlhluh, a tawlhtute kut atanga man sava (exotic birds) chi hnih – Hyacinth Macaw leh Vulturine Parrot chu Aizawl Sahuanah hian dahluh a ni a, heng sava chihnih bakah Sahuana awmsa Rufous Hornbill nen July 4 zing khan a bo tih hriat a ni a, rukchhuah a nih rin a ni.
Hemi chungchangah hian Sairang Police Station-ah FIR thehluh a ni tih deputy conservator of forest (Wildlife Division) PC Laltanpuia chuan The Aizawl Post zawhna a chhang a. Dan phal loha chawkluh sava man hi Sahuan chhunga mi nawlpui tlawh phak loh leh an quarantine-na hmunah an dah hmasa thin a, tuna bo ta tamzawk pawh hemi hmun atanga bo hi niin, a vaiin 11 an ni tih a sawi. Sava rukbo chungchangah hian Sahuana thawk zingah inhnamhnawih an awm ngei rin a ni tih a sawi bawk.
Aizawl Sahuan hungna atana an hman thenkhat chu hniam te te, lawnliam mai theih a nih thu sawiin, thawktute an indaih lo hle tih a sawi a. Sahuan atanga exotic animal bo hi a hma in vawi thum vel a awm tawh tih sawiin, tun dinhmunah thawktute tlaivarin mi pathum zel an duty tawh tih DCF Wildlife hian a sawi a ni.
Wildlife Division hotute chuan hetiang thil hi a thleng ta zauh zauh chu pawi an tih thu sawiin, tun hnu ah a thlen nawn tawh loh na’n hma an la dawn tih an sawi a ni.