Manipur boruak dai deuh rih Thalaite la inralring reng

Zo hnahthlakte leh Meitei inbeihna Manipur boruak
a dai deuh rih a, hnam pahnihte hi an inkap ul ul tawh rih lo. Mahse an inralring reng tho a, an la chawl lo.
Tun hnai chawlhkar hnih vel chu a hma anga inkah dur dur kha a awm tawh lo a, silai puak thawm awm leh zauh thin mah se inepa inkah tak tak ang kha chu a awm rih lo. |halaite erawh an la inralring reng a, a tul thuta che thei turin an la inkau reng tho tih thu dawn a ni.
Manipur-a Zo hnahthlakte hian mahni ram venhim hna an thawk a, May ni 3-a Meitei nena an intihbuai hnuah thalaite’n mahni khua theuh ven hna an thawk a ni. Meitei lamin Zo hnahthlakte hi ralthuam nen panin luhchhuah an tum thin a, chu chu khaw dai velah Zo hnahthlak lamin an lo dang thin. Chu chu an inep dan ber a ni.
Manipur-a Zo hnahthlakte chuan a che hmasa leh a bei hmasatuah an tang ngai lo a, Meitei lam an chawlh chuan inbeih pawh a awm lo tihna a ni mai tih an sawi a, tunah pawh Meitei an chet loh avangin an boruak a dai tih an sawi a, Meitei lam hi an che leh dawn em tih te, engtikah nge ni ang tih te hriat a ni lo tih te an sawi bawk.
Thu dawn danin, Zo hnahthlakte hi inralring rengin an awm a, mahni ram venhim tumin theihtawp chhuahin an la inbuatsaih. |halaite an la ‘duty’ reng a, Meitei lam an chet thuta che ve nghal thei turin inralring rengin an la awm.
Zo hnahthlak thalaite hi a tul tul ti tura pen chhuak an ni a, silai la kap ngai lo te, silai khawih ngai lo te pawh ‘duty’ turin an chhuak. Tunlai hian ngawrh lehzualin ‘training’ an nei a, veng leh khaw hrang hrangah ‘training’ an nei tih thu dawn a ni.
Thu dawn danin, sipai bangte’n hmun hrang hrangah ‘training’ hi an pe a, tlawmngai pawlte leh mi thahnemngaite’n an buaipui.
Tun buainaah hian Zo hnahthlakte an tangrual a, mipuiin thawhlawmte thawhin mahni zawn theuhvah an tang. Rs 100 thawh an awm a, a sing tel thawh te, a nuai tel thawh te an awm. Mahni tlin tawk an thawh a, thalaite pawh ‘duty’ tura koh emaw tirhluih emaw an ngai lo.
A tir atangin laipui an siam a, phungpi an ti; phungpi tih hi laipui tihna a ni a, khaw hrang hrangin phungpi hi an nei. Meitei lam hian ralthuam leh hmanrua an nei tha a, mipui chetna angin lang mah se an phenah police leh Manipur sorkar a awm tih chu Zo hnahthlakte hriat dan a ni. An inkahnaah pawh Meitei hian silai tha ber ber an hmang a, lirthei tha ber ber an nei bawk. Chung chu Zo hnahthlakte’n inbuatsaih lawk pawh awm lovin, ralthuam pawh nei lovin an lo hmachhawn a, mahni zawn theuhvah ram venhim tumin an lo ‘duty’ a ni.