Manipur buaina avanga hliam na zualte Mizoramin buaipui

Manipur buaina avanga hliam
na zualte Mizoramin buaipui
Manipur-a buaina avanga hliam tuar, hmun pui zawk panpui ngaite chu Mizoramin a buaipui a, a then Guwahati panpui an nih laiin, Aizawla enkawl an awm bawk.
Thudawn danin, May 3 atanga Manipur-a tribal (Zohnahthlak) leh Meitei inkara buaina a chhuah hnu ah, silaia kah na tuar zinga a hliam na zual mi pali chu chief minister Zoramthanga hma lakpuina in Army helicopter-in Churachandpur atangin Guwahati panpui an ni. Lirthei pawha phurh sawn ngam tawh loh khawpa hliam na, Paukhanhual – a awma silaimu tang, Diamond Thang – a kawnga silaimu tang, Hatkhanhoih – a lunga silaimu tang leh James Nangminlun – a pum leh kea silaimu tang te chu helicopter-in Guwahati hi panpui an ni.
An ni bakah hian Churachandpur atang thoin Pauginmuan (25) chu Pathianni zing khan Civil Hospital Aizawl thlenpui a ni bawk a. A ni hi May 3 thim hnu in Thengra Leirakah inkahnaah telin vanduaithlak takin silaimu a dawng a, silaimu 17 a taksaah lutin, Churachandpur District Hospital-ah silaimu 4 lakchhuah sak a ni tawh a, a taksaa silaimu awmna thenkhat hi a vascular vein bul maiah te a ni a, an hmanraw neih hmanga zai an ngam tawh loh avangin Aizawlah an rawn refer a ni. Civil Hospital-ah hian MLA pahnih – Dr ZR Thiamsanga leh Dr L Thangmawia ten state sawrkar aiawhin an lo dawngsawng a ni.
May 4-a Manipur chief minister hoa an meeting zo haw lam, Imphal khawchhunga nasa taka sawisak tawk, Mizoram dep Thanlon Assembly constituency MLA Vungzagin Valte chu New Delhi-a Appolo Hospital-ah enkawl mek a ni bawk a. Thudawn danin, a sawisatute hian electric-in an shock tel nia sawi a ni. A awm ruh hmun thuma a auh bakah a hmai ruh veilam a sawp a, a mit veilam pawh na taka hliam a ni a, tunah hian a hmai hi zai a ni tawh a, a mit veilam hian khua a hmu leh thei dawn em tih hriat a ni loa, nikhaw hre loin Neuro ICU-ah enkawl mek a ni . A ni ruala sawisak tawk, a driver Thanghaulal chu a hliam tuar loin May 6 khan a thi a ni.