Zo hnahthlak MLA te’n buaina hi tum reng vangah ngai

Manipur-ah Zo hnahthlak MLA 10 an awm a, Manipur-a Zo hnahthlakte tan inrelbawlna hran (separate administration) an duh thu an aupui mek. Hei hi tun hnaia Manipur buai hnua lo irh chhuak a ni a, Manipur buaina hi tum reng vang, ruahman lawkah an ngai.
“Pre plan a ni a, tum reng vang a ni,” tiin Saikot bialtu Paolienlal Haokip chuan The Aizawl Post a hrilh a, “Pre meditated a ni a, buaina hi tihchhuah tum sa an awm,” a ti.
An chief minister Biren Singh a dem a, Manipur-a buaina chhuak hi tum lawk thil tia sawiin, “Amah Biren pawh a tidik lo a,” a ti.
Kar hmasa Zirtawpni khan Zo hnahthlak MLA-te hian thuchhuah intawm siamin Manipur-a Zo hnahthlakte tan inrelbawlna hran neih an duh thu an puang a, hemi chungchangah hian zau zawka inrawnkhawm an tum mek.
“Biren pawh a tel a, Meitei-in min duh tawh lo tih hi a chiang a,” Paolienlal Haokip chuan a ti a, “Manipur mi ni lo turin min duh a, chuvangin Zo hnahthlakte hi separate administration-ah awm ila a him ang, chu chu kan tan a tha,” a ti bawk.
Inrelbawlna hran (separate administration) an tih hian a awmzia chiang faka sawi theih a nih rih loh thu a sawi a, “State pawh a ni thei, UT pawh a ni thei,” tiin, zau zawka inrawnkhawm tum a nih thu sawiin, “Kan mite nen kan inrawnkhawm ang a, kan sawiho ang,” a ti.
Zo hnahthlakte tana inrelbawlna hran an aupui tur hi eng nge a nih ang tih chu, mipuiin an thlang ang tiin a sawi a, Zo hnahthlakte’n duh an thlang ang tiin a sawi.
Zo hnahthlak MLA-te hi mipa vek an ni a, an zinga panga chu Manipur-a sorkarna changtu BJP an ni. Mi dang pahnih chu JD(U) an ni a, mi dang pahnih chu Kuki People’s Alliance, pakhat chu independent MLA a ni.