Manipur buainaah BJP thil
tum ruk a awm – MPCC
Manipura buaina phenah BJP sawrkar thil tum ruk a awm ngei nia an hriat thu Congress party chuan an sawi.
Zirtawpnia MPCC inkhawm chuan Manipur buaina chungchangah hian resolution siamin an pawm a. ‘2023 May 3 atanga thenawm state Manipura Meitei leh Zofate inkara inbeihna thleng hi Congress party chuan a tir atangin ngun takin a thlithlai reng a. He buainaah hian a phenah BJP sawrkar thiltum ruk (hidden agenda) a awm ngei niin kan hria. Kristiante biak in tam tak suasam a, hal chhiat a nihnaah leh hnam tenau zawkte rawt chimih tum a, thiam tak leh rawng taka hmalakna kal mekah hian Manipur BJP sawrkar hi thuk takin a inrawlh tih hi Congress party ngaihdan leh hmuhdan a ni,’ a ti.
‘Hetiang thil rapthlak tak, India ram inpumkhatna thlenga tiderthawng thei a thlen mek laia PM Narendra Modi-a’n India khua leh tuite thlamuan tura tawngkam khat mah a la chhakchhuak duh lo hi hriatthiam theihah kan ngai lo a. He buaina hi a rang thei ang bera hmeh mih a nih theihna turin sawrkar laipui thachakna hmangin, chak taka hma la nghal turin Prime minister kan phut a ni,’ a ti bawk.
MPCC president Lalsawta chuan Mizorama hnam hrang hrang leh kan sakhua a him theihna’n BJP sawrkarna paih a ngai tih sawiin, MPCC hruaitute leh AICC hruaitute inkawmnaah Mizoramah Congress party-in sawrkar tha, a ram chhunga hnam leh sakhua humhimtu tur, BJP chakna leh pawisa it ve lo sawrkar siam a tul tih chu an thutlukna a ni tih a sawi.
Chumi atan chuan India leh khawvel hmun hrang hranga thalaite ngaihsan rawn Rahul Gandhi pawh Mizoramah a lo kal thuai dawn tih a sawi. “Congress party chuan Zoram mipui tan sawrkar tha kan tiam a. Politician, ram aia mahni indah hmasa zawkte kan hnawl dawn a, Mizoram mipui pawhin hetiang mi hi hnawl turin ka ngen a ni,” a ti.
Manipur buainaah BJP thil tum ruk a awm – MPCC
Get real time updates directly on you device, subscribe now.
Prev Post