Manipur raltlanten ration buhfai la thei ta

Manipur-a buaina avanga sahimna zawnga Mizorama tlanlut zingah National Food Security Act hnuaia hamthatna dawng thei chhungkuate chuan an awmna atanga nai berah ration buhfai an la thei ta.
Food Civil Supplies & Consumer Affairs directorate chuan hriattirna tichhuakin, Manipur state-in harsatna a tawh mek avanga Mizorama an sahimna zawnga raltlanten ei leh bara harsatna an tawh a lo ziaawm theihna’n Mizoram sawrkar chuan sawrkar laipuiah raltlan zinga NFSA beneficiary (AAY leh PHH chhungkua) ten One Nation One Ration Card (ONORC) hmanga an buhfai quota an lak ve theih dan tur ruahmanna a siam chu an rawn tihfel tak avangin raltlanten an raltlanna hmun atanga FPS (retailer) hnai berah an buhfai quota an la ve thei tawh tih a sawi.
‘Mizoram mipuiin kan thenawm hnaivaiah Manipur raltlan (Manipura an awm laia NFSA beneficiary te) an awm a nih chuan he hamthatna an hmuh theih hi inhrilh bengvar tura ngen kan ni a. Ration la tur hian ration card number emaw Adhaar number emaw an hriat chuan a lak theih,’ a ti. Tun dinhmunah ONORC hnuaiah hian chhungkaw thum (member pasarih) hnenah ration buhfai hi pek a ni tawh.