Chhattisgarh-a Sukma district-ah Ningani khan venhim hna thawktute nen an inbeihnaah Maoist pathum thah an ni tih state Deputy Chief Minister Vijay Sharma-a’n a sawi.
“Venhim hna thawktuten Maoist laka beihpui an thlaknaah hlawhtlinna ropui tak an chang,” a ti.
Home ministry changtu, Sharma hian Maoist ruang pathum hi hmuh tawh niin beihpui thlak zui zel a ni tih Raipur-a thuthar lakhawmtute a hrilh.
January 6-a Bijapur district-a Maoist-ten IED tipuanga venhim hna thawktu mi pariat leh an chuanna lirthei khalhtu thihna thleng sawi kaiin deputy chief minister chuan, “Kha thil khan venhim hna thawktute a tithinrim hle a ni,” a ti.
“Anmahni pawh ka hmu a, sipaite chakna leh huaisenna nen Maoist-te hi tihchimih an ni ngei dawn tih ka sawi a ni,” a ti.
Union Home Minister Amit Shah pawhin Thawhtanni khan Maoist-te hi March, 2026-ah chuan tihchimih an ni dawn tih sawiin Chhattisgarh-a venhim hna thawktu an thahte pawh a lo thlawna thi an ni dawn lo tih a sawi.
Tun tuma inbeihna hi Ningani tuka Sukma leh Bijapur district inrina vela chhuak niin venhim hna thawktu pawl hrang hrang tanghovin Maoist lakah beihpui an thlak tih police chuan an sawi.
District Reserve Guard, Special Task Force leh CoBRA (CRPF hnuaia Commando Battalion for Resolute Action) mite an tel thu an sawi.
Tun tuma mite nen hian kuminah Chhattisgarh-ah hian Maoist pakua thah an ni tawh.
January 6-a zawh, ni thum chhung Narayanpur-Dantewada-Bijapur district inrina, Abujhmad-a Maoist laka beihpui thlaknaah hmeichhe pahnih telin paruk thah an lo ni tawh.
January 3 pawh khan Gariaband district-ah Maoist pakhat thah a lo ni tawh bawk.
Nikum khan Chhattisgarh-ah hian beihpui thlakna hrang hrangah Maoist 219 thah an ni.
Maoist pathum thah an ni
Get real time updates directly on you device, subscribe now.
Prev Post