Masi laia khualzin fuankhawmna hmunpuiah Mizoram siam kan tum: – Tourism minister

On Dec 12, 2025 4 0

Krismas boruak lai vela khualzinmite fuankhawmna, Christmas destination-ah Mizoram chu sawrkarin siam a tum a, kuminah liantham loin bul an tan nghal dawn tih Tourism minister Lalnghinglova Hmar chuan a sawi.
FRel-in Sairang a thlen hnua khualzin rawn lut an tam danah, September leh October chhung khan manual-a inner line petmit la mi 9000 an chuang a, online-a la leh November-a ILP la nen phei chuan Mizoram-a rawn lut hi an pung tih a hriat theih tih minister hian a sawi a. Khualzinte lo kal chhan leh enge an rawn tih tih zirchiangin, Mizoram mawina leh boruak nawmna piahlamah kal chhan tha lo chhawp sak a ngai tih a sawi a ni.
Hemi tur hian nakkum atanga hman tur ‘tourism calendar’ an siam a. January atanga December chhunga Mizorama huaihawt tur ‘event’ awmte chu pho lar a ni dawn tih a sawi.
A bul tanna atan December 15-20 leh 23 khian Aizawl Lammualah ‘Winter Festival 2025’ huaihawt tum niin, Krismas lam hawia kalpui a ni anga, December 23 bik hian chuti lam hawi ‘costume parade’ leh ‘carol’ a awm ang a, Lammual leh a chhehvel pawh ‘Krismas theme’ a chei a ni dawn tih Tourism minister hian a sawi a ni.
“Mizoram hi tourist ho tan Christmas destination-ah chantir kan tum dawn a. Kohhran programme tibuai si loa kalpui tum a ni,” a ti.
December 31 tlaiah, chawhnu dar 1.00 vel atanga tanin Sakawrhmuituai Tlangah kumhlui ni tla tur a huhoa thlirliamna hun chu Sihphir khawtlang hruaitute bakah Sakawrhmuituai Development Committee tangtlangin huaihawt tum a ni tih Lalnghinglova Hmar hian a sawi a. Hei pawh hi tualchhungmite atanga tanin, India ram chhung leh ram pawn miten an rawn chhim chak theih tur zawnga huaihawt zel tum a ni tih a sawi a ni.
January 6 & 7 hian Phuaibuangah Tlaizawng par mawina behchhanin hun buatsaih tum a ni a; Tuivaiah a huhoa nghakuai chiah leh Phuaibuang khaw bul Hriangmual Tlang-ah ‘adventure hiking’ a kal theih a ni dawn a, a duh tan puan in kaih theih niin, Phuaibuang khawtlangin lei turin a chhimtute tan chaw an lo buatsaih sak dawn tih a sawi.
An ruahmannaah department-in hlawkna tel a tum loa, an behchhan khawtlangin an hlawkpui theih dan tur – community based tourism an thlir a. Thlen in pawh home stay lam hawi an uar dawn tih a sawi bawk.