May ni 10-ah Vana vs Taira thlir tur awm dawn

Pathianni hian Mizo hnathlak zinga Ultimate Fighting Championship (UFC) champion kan neihchhun Joshua Van chuan octagon a lut leh dawn a, world flyweight championship-ah Japanese fighter tha Tatsuro Taira a hmachhawn ang. Tuntum hi Asian ve ve inbeihna a ni dawn.
Kum 24 mi Vana hi Myanmar atanga United States lama pemlut niin, nikum khan UFC flyweight champion Alexandre Pantoja Passidomo a hneh a, UFC champion ni thei naupang ber dawttu leh Asia khawmualpuia piang mipa champion hmasa ber a ni nghal.
Brazilian professional mixed martial artist Pantoja lakah Vana kha rinkai lo zawk ni mah se tan atanga reiloteah Pantoja khan a ban a tina a, inkhel hah lutuk hman loin Vana a chak a; South American fighter duhdan ang takin Joshua Van khan ‘rematch’ khelhpui zui leh nghal cho thak zak mah se ngaiawh leh tura hun a duh deuh dawn avangin Pantoja nghah chhungin Vana hian Taira lam a hawi rih ta a ni!
Zo hnahthlak Vana hian championship belt kuah hlawm reng a tum lo a, champion chechhuak nih a duh a, Japanese lakah fiahna dang a hmachhawn leh dawn a, Pantoja lakah khan a lo vannei mai mai em ni tih zawhna chu hnehna nena chhan a duh ngeiin a rinawm.
UFC ngaihven leh tuipuitute’n a chanchin kan hriat fo tawh angin, Vana hian US a luh hlimah saptawng a thiam lo a, sikul lamah pawh hmuhsit leh diriam a hlawh thin a, sapho laka a thil tawn avanga infiamna rothap ber hi luhchilh ta pawh a ni reng a ni!
A professional career la rei lo takah record chhe lo tak nei tawhin, Pro MMA-ah vawi 16 chak tawhin vawi hnih chiah a la tlawm a; a boxing skills tha tak hi a record chhuanawm tak puitu tha niin, a kut a ran em avangin UFC-ah minute khat chhunga tumpuite hnek fuh hnem ber record chelh mektu a nih piahlamah flyweight bikah hian tumpuite nena khawih fuh zat inthlau ber record a chelh mek bawk!
A tumpui tur Japan pa ve thung hi chu naupan laia combat game tuipui lo, baseball khel thin a nih lain a u hnung zuiin glove a bun a, a u nen hian an inhnek fiam thin a, a hnu lama MMA lam hawi chho zui ta a ni.
Kum 26 mi Taira hi flyweight bakah strawweight leh bantamweight lamahte pawh lo khel kual tawhin, a pro career-ah vawi 18 chak tawhin, a ngam loh awmchhun chu Joshua Van laka lo tlawm tawh Brandon Royval a ni!
An sulhnu en thuak hi chuan Vana hian rin a kai zawk ngeiin a rinawm a; engpawhnise, Pathianniah tunge chak zawk kan hria ang.