MCC bawhchhiat thu RO-ah thlen Mipui tham lo ah minister puh

MCC bawhchhiat thu RO-ah thlen
Mipui tham lo ah minister puh
Lunglei Municipal Council inthlan tura a campaign-naah MNF adviser, minister Lalchhandama Ralte chuan SEDP sem hun tur chungchang a sawi dan chu election model code of conduct bawhchhiatna a ni, tiin, March 20 khan Lunglei Congress Thalai chuan LMC returning officer hnenah complaint an thehut a. Minister thusawi dan chu Lunglei mipui thamlohna a ni tih an sawi bawk.
LDYCC thuchhuak chuan, March 16 khan minister leh MNF adviser Pu Lalchhandama Ralte hian LMC Ward No.XI-a Campaign Office a hawnnaah, March thla chhunga SEDP 2nd instalment sem tum a nih thu leh second phase pawh kalpui nghal tur a nih thu mipui hmaah a sawi a ni tiin, ‘Kum 5 dawn sawrkarna an chelh tawh hnu ah 2018 MLA inthlanpui kan hmachhawn taka in tinah SEDP cheng nuai 3 kan sem dawn, tia mipuia an lo tawktarh tawh vawiin thlenga chhungkaw thenkhata Rs 25000 pawh an la sem zawh theih loh lai a, hetianga LMC inthlan kan hmachhawn tura mipui rilru a diklo zawnga kaihruai thei tur leh dawt hmanga inbumna thu a sawi hi Lunglei mipui tham lohnaah kan ngai,’ a ti.
Mizoram sawrkara a fawng vuantu berin dawt thu hmanga mipui thlemna’na thu a chhak chhuak hian State Election Commission Mizoram-in model code of conduct a siam bawhchhiatna lian tak a ni tih LDYCC hian a sawi a. Thu lawilo hmanga Lunglei mipui bumna’n leh vote zawn duh nana Pu Lalchhandama Ralte in thu a chhakchhuak chuan mipui rilru a ti na in, MNF-in MCC an palzutna chu thuneituten bengkhawn saka hma la turin an ngen tih a sawi a ni.