MEA-in Los Angeles-a Indian-te fimkhur turin chah
MEA-in Los Angeles-a Indian-te fimkhur turin chah
Indian Ministry of External Affairs (MEA) chuan US-a Los Angeles khawpuia duh lohna lian tak lantir meka mipui leh dan kengkawhtute innawrna thleng mekah Indian awmte chu fimkhur tur leh an himna tur ngaihtuah tha turin a chah.
MEA thupuangtu, Randhir Jaiswal-a’n Ningania thuthar lakhawmtute a kawmnaah, “Los Angeles-a thil thleng mek hi kan ngaihven reng a, ram danga kan khua leh tuite himna leh thatna tur kan ngaihtuah a, kan ngai pawimawh em em a ni,” a ti.
“Los Angeles huam chhung leh California pumah hian Indian an tam em em a. Indian zawng zawngte hi eng emaw palhah pawh an himna tura hma la turin kan chah a. San Francisco-a kan consulate pawhin ngun takin thil thleng hi a thlir reng a, kan mite himna leh thatna turin thil a ruahmanin a bepawp reng a ni,” a ti.
US khawpui lian ber pahnihnaa mipuiin duh lohna an lantir hi President Donald Trump-a sorkara Immigration & Customs Enforcement (ICE) agent-ten khawpui puma an rama dan lova pem lutte dap chhuah beihpui a thlak atanga intan niin dan lova awm tam tak an man tawh.
Mipuiin sorkar hmalakna hi dodalin dan kengkawhtute nen an inep nasa hle a. A hmehmih nan Trump-a chuan National Guard sipai 4,000 leh Marines 700 a tir lut tawh.
President hian a Truth Social account-ah, “Tun hmaa American khawpui ropui tak thin, Los Angeles hi dan lova lo lut ram dang mi leh dan bawhchhiaten an rûnin an luah ta a. Tunah hian tharum, intibinga inhlawm khawm mipuiten kan federal agent-te chu heng mite thawn chhuah beihpui an thlakna dan tumin an thawk chhuak a; mahse, dan lova chete hian kan hmalak tumna a tichak sauh zawk a ni,” tiin a tar lang.
California Governor Gavin Newsom-a chuan Trump-a’n Marines leh National Guard sipai a tir lut chu a bei let nasa hle a, a sorkar rawn lovah a puh a. US-ah hian tual chhung venhimna thilah sipai an inrawlh ngai meuh lo.
“Mipui rorelna hi kan mithmuh ngeiah palzut a ni,” tiin Newsom-a hian Thawhlehni zan khan a sawi a, “He hun hi a lo thleng ang tih kan hlauh em em thin kha a ni,” a ti.