MG Majestor-in rel kawngah rel hnukin record siam

JSW MG Motor India-in April ni 20-a India-a an tlangzarh tur MG Majestor SUV chuan Guinness World Record a siam a, SUV zinga rel kawnga rel hnuk rit thei ber a ni. MG Majestor hian WAG-9HC rel chu rel kawngah a hnuk tawlh ruau ruau mai a, he rel hi tonne 406.4 (kg 4,06,400) a rit a ni a, Jammu & Kashmir a Kakapora leh Awantipora railway station inkarah feet 300 a thui a hnuk tawlh, a hmaa hetiang record, tonne 400 a rit rel, rel kawnga hnuh tawlh thui record chu feet 100 a rawn khum ta a ni.
MG chuan record siam tura tehna pawimawh hrang hrang, rel rih zawng, a kawng awmdan leh thui zawng te chu Guinness World Records verification protocol ang thlap a nih thu an puang a, he SUV hi rel hnuk tur hian a engine-ah engmah tihdanglam a awm lo a, a nih phungah pawh engmah an tidanglam lo niin an sawi a, a tyre pawh an an hralh chhuah tura an vuah ang tho an hmang niin an tarlang. An tihdanglam awmchhun chu rel kawng a zawh sual loh nana a khalh ngil tu tur rail wheels a hmaa an vuah chu a ni deuh mai.
MG Majestor hian 2.0-litre twin-turbo diesel engine neiin, 212.5 bhp leh 478.5 Nm torque pechhuak thei a ni a, 8-speed automatic transmission a nei bawk. He SUV hian Triple Differential Locks (front, rear & centre) a nei a, a zawlpui zingah hetiang nei hmasa ber niin an chhal a, Advanced 4WD system leh off-road mode ci 10 a nei bawk.