Sairang – Vairengte kawng siam mekah CYMA-in hmasawnna hmu

Central YMA Road Monitoring Committee chuan Ningani khan Sairang to Vairengte kawngpui siam mek leh Kawnpui to Sihphir kawng siam mek an endik leh a. Thla khat hmalam, March thla bul lama an endik atangin hmasawnna an hmu tih an sawi.Sairang to Vairengte inkar kawngpui siamtu contractor zingah, Sairang to Buichali leh Kolasib to Bilkhawthlir inkar siamtu J-Infratech hmasawnna erawh beisei aiin a muang hle tih CYMA Road Monitoring Committee hian an sawi a. An inkawmhonaah CYMA hruaitute hian NHIDCL leh J-Infratech hotute chu nasa zawka tan la turin an hrilh. J-Infratech hotute chu ni khatah hnawthawh hun hnih (shift hnih) siam a, darkar 16 zel nitina thawk turin an ti a. J-Infratech hotu hian April 20 atangin hetiang hian hna an tan nghal tur thu, an sawi a ni.
CYMA hruaitute chuan Sairang to Vairengte inkar kawngpui hi, Mizorama kawngpui pawimawh ber (life line) a ni tih NHIDCL leh contractor-te hi an hrilh nawn a. Fur ruahtui tlak tak tak hmaa an hna thawk zo vek ngei turin an chah nawn.
Kawnpui to Sihphir kawng siam mek pawh an endik a. BRTF hotute leh contractor-ten an ngenna ngaipawimawha theihtawpa tan an lak avangin CYMA hian lawmthu an sawi a. An kawng siam mekin a nghawng avanga kawng khuar chhe lutuk lai hnawh tura an tihte pawh tha taka an lo hnawhmam avangin lawmawm an tih thu an sawi a ni. Kawng siam hmabak hi a tam tawh loh avangin, tha tak leh rang taka thawk zo thuai turin BRTF hotute leh contractor-te hi an ngen zui a ni.
Kawngpui siam endiknaah hian CYMA hruaitute hi Sub-Hqrs YMA Kolasib hruaitute leh Sakawrhmuituai Group YMA hruaituten an tawiawm a ni.