Mi pakhat rorelna a tawp tawh : Pawar

Last updated Jun 14, 2024 6 0

Prime Minister Narendra Modi sawi chhanin, Nationalist Congress Party (SP) chief Sharad Pawar chuan ‘mi pakhat rorelna’ a tawp ta a, Central sorkar chu Bharatiya Janata Party (BJP) ten thawhpui nei lovin an siam thei lo a ti.
“Modi guarantee a tawp tawh a, chu chu voter te thiltihtheihna vang liau liau a ni” tiin kum 83-a upa Sharad Pawar chuan Baramati (Pune district) a tlawhnaah a sawi bawk.
Sharad Pawar party te chuan Lok Sabha inthlanah khan seat 10 an chuhah pariat an la a ni.
“Tun hnai kum 10 chhungin kan ram sorkar chu one-person system a ni bur a, tunah chuan inthlan zawh hnuah chuan chu sal ata chu chhuah zalen a ni ta a ni. Central sorkar chu midang party puihnaa siam a ni ta a. Sorkar chu Bihar Chief Minister Nitish Kumar leh Andra Pradesh Chief Minister N. Chandrababu Naidu te puihna tel lo chuan a ding thei lo, a awmzia ber chu mi pakhatin sorkar a kalpui chu tihtawp a ni ta a ni. Modi aupui guarantee chu a tawp tawh a, a titawptu chu mipuite an ni” tiin Sharad Pawar chuan a sawi.
State Assembly inthlanna neih turah pawh Lok Sabha inthlan result zul zui tho a ni ang a ti bawk a.
“Lok Sabha inthlan hnuah Assembly inthlan a awm dawn a. He state a thuneihna chu mipui kutah kan dah ang a, chu thuneihna chu mipuite tan hman a ni ang a. Chumi tur chuan in thawhpuina ka mamawh a ni,” tiin Sharad Pawar chuan a sawi bawk.
NCP (SP) chief chuan a nephew hel mek Maharashtra Deputy CM Ajit Pawar chu tun hnai lawka Lok Sabha inthlanah khan a hneh hle a, Pawar Supriya Sule chuan Baramati Lok Sabha seat ah a sister-in-law Sunetra Pawar (Ajit Pawar nupui) chu a hneh a ni.
NCP(SP) te chuan Ahmednagar leh Beed ah pawh BJP candidate te chu Sujay Vikhe-Patil leh Pankaja Munde te hmangin an hneh ve ve a, an pahnih hian a tirah chuan Ajit Pawar lamtang an ni a, a hnuah Sharad Pawar an zawm leh zawk a ni.
Lok Sabha inthlanah NCP(SP) te an chak em avangin Ajit Pawar camp lam atangin tlan tau tum an pung nasa tia sawi a ni bawk.Mahse, hei hi hnawlin NCP (Ajit Pawar) faction State chief Sunil Tatkare chuan Sharad Pawar faction lam MLA ten an hnena luh tumin an be ve reng zawk a ti ve thung.