Mi sualten Mexico khelmual an luhchilhnaah mi 11 that

Mexico laili, Salamanca khawpuia Pathianni zana mi sualten football khelmual an luhchilhnaah tual chhung mi 11 vel an that a, mi dang thahnem takin hliam an tuar bawk.
Thil thleng hmutute chuan mi sualte hi lirtheiin an ralthuam nen an thleng a, khelmualah lutin lo pungkhawmte chu thlir bik pawh nei lovin an pawng kah chiam niin an sawi.
Tual chhung club pahnih inkhel en hian chhungkuaa thawk chhuak pawh an awm nual a. Thi zingah hian hmeichhia leh naupang pakhat ve ve pawh an tel.
Inpawng kahna thlen chhan hi hriat a ni lo a, Salamanca khawpui awmna, Guanajuato state hi nikum khan Mexico puma mi thah tamna ber state erawh a ni.
Loma de Flores venga Cabañas khelmualah hian silai vawi 100 vel a puak niin a bul hnaia chengten an sawi a. Tual chhung leh sorkar laipuia venhim hna thawktuten an chhui zui mek.
A hma ni chiah khan he khawpuiah hian tharum thawhna thleng tawhin mipa panga thah an ni a, mi dang ruk bo an ni bawk.
Guanajuato-ah hian gang-ten tuialhthei an ru thar nasa hle bawk a, ruihhlo tawlh leh mi pawisa chhuh an ching bawk a. Tuialhthei phur truck tidingin an phur an chhuhsak a, a changin sorkar hnuaia oil company Pemex pipeline tichhiain an ru thin bawk.
Salamanca hi Pemex tuialhthei thlitfimna hmun lian tak awmna a ni a, hemi kaihhnawihah hian mi sual pawlte an che fo thin bawk.
Mi thiamte chuan tharum thawhna thleng phenah hian Jalisco New Generation Cartel (CJNG) leh Cartel de Santa Rosa de Lima (CSRL) gang indona a awm niin ans awi.
Mexico-ah hian dan bawhchhiaa chetna, a bikin tuialhthei ruk leh ruihhlo tawlh hi a tam a, US thlengin a nghawng a. Nikum khan US State Department chuan CJNG hi Foreign Terrorist Organisation-ah puangin CSRL lakah hrekna a kalpui thar bawk.
Mexican President Claudia Sheinbaum-i chuan kar hmasa khan mi sual rual 37 chu US hnenah a hlan a, hei hi tual chhung chanchinbute chuan US-in ruihhlo tawlhtute a beihna a thawhpuina leh Trump-a hnena Mexican ram chhunga cartel-te bei tura phalna a peknaah an ngai.