A film hmingah ‘Michael’ tih a ni dawn a, King of Pop, Michael Jackson rimawi khawvel mai bakah a mimal nun thlenga tarlanna film chu Lionsgate-in an siam dawn a, Antoine Fuqua chu director a ni ang. He film hi Bohemian Rhapsody producer Graham King leh John Brance leh John McClain ten an produce dawn a, Micael Jackson estate an tel bawk ang.
-- Advertisement --
Fuqua chuan, “Film lama ka bul tanna chu music video a ni a, vawiin thleng film leh music kaihkawp hi keimahah hian a bet ve tlatin ka hria. Ka tan chuan Michael Jackson tluk a mi hipna ngah, rimawi lama talent nei tha leh huhang nei lian zawk hi an awm chuang lo. A huhang hian ka music video siamah pawh nghawng a nei pha- mihang zaithiam zingah MTV-a play lawh thei hmasa ber a ni. A rimawi leh hlimthla te kha ka khawvel pakhat a ni ve a, tunah a rimawi leh a chanchin te screen lian zawka phochuahna theihna chance ka nei ta hi ka tan chuan hnar phal chi rual a ni lo,” a ti.
Michael Jackson rimawi zin kawng hi a ropui hle a, Billboard Hot 100 (singles) chart-a No.1 kai thei pawh hla 13 a nei hman a ni. MJ hi an chungkaw band Jackson 5 atanga rawn lar chuak a ni a, an hla pali chu Hot 100-ah No.1 a kai nghe nghe a ni. Solo artist angin Michael Jackson hian 1982 khan a album ‘Thriller’ a tlangzarh a, khawvela album tlangzarh tawh zingah hralh tam ber pawl niin, Billboard 200 (albums) chart-ah pawh kar 37 chhung a No.1 thei a, he album-a a hla pasarih chu Hot 100 chart-ah top 10 an kai pha vek bawk,
Michael Jackson hi June ni 25, 2009 khan kum 50 mi niin a thi.