Midangte that lohna lai ngawt sawia politics khelh a tha lo – Lalsawta

Midangte that lohna lai ngawt sawia
politics khelh a tha lo – Lalsawta
Midangte that lohna lai hlir sawi ringawta politics khelh chu tha a ti ve lo tih Congress president Lalsawta chuan a sawi.
Inrinnia Aizawl South-I Congress Block Conference neih a hmanpuinaah Lalsawta chuan, party dang emaw midang emaw a sawichhe hman loa, ram tana an thiltum chu sawi chu a pawimawh berin a hria tih sawiin, “Mi kan hnial a, kan nek vak vak hian kan hneh chuang lo. Thil sawt lo, tha bawk si loah chuan hun hmang lo ila a tha,” a ti.
Ram hmangaihna tak tak nena enkawl a, mahni chhiat phah rak khawpa an beih phawt chuan Mizoram hi an siamtha thei tih ring tlat turin party mite a chah.
“Mirethei berte, hausa berte, thalaite leh mipui zawng zawng tana sawrkar tha siam hi kan duh a. Chutiang tur chuan keini hi koh hran kan ni. Mizoram hi siamthat theih a nih chuan Congress party hi a siamtha thei tur kan ni,” Congress president hian a ti.
Sum puk vak vak loa ram sum dinhmun siamthat chu an tih tur a ni, tiin, tunah chuan sawrkar leh turte tan pawha harsatna thlen thei khawpin Mizoramin leiba a ngah tawh tih a sawi. Chhiat lam kan pan zel loh na’n sawrkar lai chu hnawl a ngai tih a sawi bawk.
“NLUP atangin tanpuina cheng nuai khat kan pe ang che u kan ti a, kan pe reng bawk a. Chhungkaw thenkhatin hlawhtlin pui lo mah se, chhungkaw tam tak chuan an dinchhuahpui a ni. Cheng nuai 3 pek min tiam laia cheng 25000 sem nen hi chuan a inang lo hle. Mipui nawlpui dinhmun chawisan a, miretheite dawmkan hi Congress party hna pawimawh ber a ni,” Lalsawta hian a ti.
Hnamdangten Kristian nih ve an chakna tur khawpin ram tha leh duhawm, thawkrim leh taima, remhriate dinchhuahna ramah Mizoram chu siam tum tur a ni tih a sawi bawk.