Middle school atangin moral reform tan dawn
Middle school chu sual zir tanna anga ngaih a nih avangin, hemi atang hian sawrkar chuan ‘moral reform’ tih a tum a. Awmdan mawi, nungchang tha, tlawmngaihna leh aia upa zah thlengin inzirtir thar tum a ni dawn tih School Education minister Dr Vanlalthlana chuan a sawi.Mizoram Board of School Education-in Random Examination 2025 a buatsaih report card leh mobile app pahnih – Confidential Material Tracking & Monitoring System leh School Report System chu Ningani khan School Education minister hian a tlangzarh a. Kan ram zirnaah subject hrang hrangah rampum huap chawhrual, national average kan la pha loa, pha tura tan a ngai tih a sawi. Random Examination 2025-ah zaa 65-in an pass thei, tiin, SCERT-in Standardized Assessment for Elementary Schools a kalpui bawk a, heng hian kan zir chhuah a tihsan beisei tih a sawi a ni.
Zirlaiten a bulthut an thiam loh chuan entrance hrang hrangah kan dinhmun a sang thei lo tih sawiin, a lo lan chhuahnaa ler thlir mai loin, a bul chhui a ngai tih a sawi. India ramah Mizoram chu ami cheng zat chhutin ruihhlo ti nasa ber kan ni tih sawiin, “Hei hi khawi atanga lo intan nge tih chhui a ngai. Middle school an kal lai atangin sual an zir tan a. Chuvangin, India ram pumah state drug policy nei hmasa ber kan ni dawn a, district-ah inrawnkhawm mek a ni. Middle school atanga moral reform tan tum a ni a, an en duh zawng comics hmangin awm dan mawi, nungchang tha, tlawmngaihna leh aia upa zah pawh inzirtir tum a ni,” a ti
Zirna siamthatna atan question design a that a ngai a; random examination leh common question hian min puih theih beisei a ni tih Education minister hian a sawi a. School thenkhatin class IX syllabus an zirtir kim loa, zirlaiten a bulthut an man loh phah a, an kalzelnaah harsatna an tawk tih a sawi. “Zirtirtuten a kim thei ang bera zirtir turin ka ngen a ni,” a ti.
Class IX-ten Random Examination 2025 an neih takah khan state dinhmun hriatna atan class 3,6 & 9 ah Mizoram district tinah buatsaih a ni a. School 232-a zirlai 8856-in exam an hmachhawn a. Subject panga – English, Mizo, Mathematics, Science leh Social Science-ah zawhna siam a ni a, subject tinin mark 20 zel a pu a, MCQ hmanga exam a ni. Mi 5778-in mark zaa 40 an hmu a, pass-a puan an ni a, zaa 65.24 an pass.
Confidential Material Tracking and Monitoring System (MBSE-CTMS) hi Board Exam Centre superintendent-ten exam thil pawimawh hrang hrang vawnthat, chhui leh report-na atan hman a ni dawn a, School Report System (MBSE-SRS) hi exam chungchanga Board leh school-te indawr tawnna tura ruahman a ni.