Middle school provincialise tawhten dinhmun ngai phutin sawrkar nawr

Adhoc aided high school-ten provincialise an nih tawhna tun sawrkarin sut a, dinhmun hniama a dah leh tak avanga lungawiloh an lantir hnu ah adhoc aided middle school pawhin August 3 atang khan hemi ang bawk hian phut neiin sawrkar an nawr ve leh tan a, tunkar chhung school-ah badge dum an bel dawn.
Mizoram Government Adhoc Aided Middle School Teachers’ Association thuchhuak chuan, Mizoram sawrkarin Mizoram Education (Provisional Adhoc Grant-in-Aid for General Maintenance of Private School) Rules 2025 a tihchhuahah he rules hian deficit grants -in-aid schoos, adhoc grants -in-aid school leh provisional adhoc grants -in-aid school a huam angin he dan thar hi an zirchiang a, tun leh hun lokal zel atan zirlaite leh school tan thil tha lo tam tak a thlen thei dawn niin an hria a, tha an ti lo hle tih a sawi.
Tha a tih loh chhan chu, ‘The Right of Children to Free and Compulsory Education Act 2009’ in naupang kum 14 leh a hnuailam, hmangaih leh duhsak taka km.3 aia hlaa middle school (upper primary) zirlaite school kal lo tura a tih mek lai a, sawrkarin an dinhmun phet thlaa dinhmun hniam zawk leh school pawh khar mai thei dinhmuna dah a tumna hian, naupang school kalna pawh hla tak tak ni thuai mai thei dinhmunah a dah zui a. Hei hi elementary education dah pawimawh tawk lohna leh RTE Act ngaihpawimawh tawk lohna leh palzutnaah an ngai tih a sawi.
Sawrkar hmasain, October 2023 atanga hman tan tura dinhmun tha zawka a dah tawhna thiahsak an nih hnuah, dan chhe tak, tuna an dinhmun mek, adhoc aided dinhmun pawh tluk zo lo tur dan, thlir thuaka that hmel tak, zirchiana tha hauh si lo barhluih a tum chu an duh loa, pawm theih chi ah an ngai lo tih a sawi a ni.
Sawrkar school leh zirlaiten an dawn hamthatna – Composite School Grant, Library Grant, Sports Grant, Eco Club leh Youth Club Grant, Uniform Grant leh hamthatna dang, school leh an naupangten an dawn ve theih hun nghakhlel taka an thlir thin chu engtikah mah dawng ve ngai lo tura siamtu a nih dawn avangin pawm theihah an ngai lo tih a sawi bawk.
Sawrkar hmasa in a lo dah tawhna (provincialised) humhim tur leh school, zirlai leh khawtlangin hamthatna an dawn tawh, an hloh leh tak hmu let leh tumin hmalak dan tur ruahmanna an siam tih sawiin, mipui thlawpna leh tawiawmna bakah sawrkar hotute khawngaihna leh hriatthiamna sang ber an ngen tih a sawi a ni.
Mizoram Government Adhoc Aided Middle School Teachers’ Association ruahman ang chuan, August 3 – 7 chhung hian member zawng zawngin badge dum an bel dawn a. August 10-12 chhung badge dum bel chungin pendown strike/ No Teaching Day an hmang ang.
Hei hian an beisei anga awmzia a nei lo a nih chuan August 18 hian member zawng zawng an kal zel dan tur ngaihtuahin Aizawla kalkhawm turin an inhriattir a ni.