Migraines a control theih

Migraines a control theih
Migraines chu nerve vûng-in thluaka thisen zam a nek puar vanga awm niin an sawi a. Lu a na ngut ngut a, êng an ngaithei lova, luakchhuak te pawh a siam thei. Migraines vanga lu na awm chhan tak hi hriat chian a la ni lo niin an sawi a, mahse, a symptoms hi a tihnep theih niin an sawi a, a rawn lang chhuak tur pawh a ven theihna chen a awm niin Dr Praveen Gupta leh Dr Sindhu Nair te chuan an sawi a, heng mithiam pahnih ten Times Of India health section-a migraines chungchang an ziah te kan rawn tarlang e.
Mithenkhat chuan an lu pang khingah chauh na an tuar a, thenkhat chuan migraine a rawn thawh tak tak hmain warning symptom ‘aura’ an tih mai te an hre thin. Aura chu warning a ni a, a tlangpui thuin khaw hmuh a fiah lo a, mit a na a, arsi leng deuh chum chum te hmu a, rin in kawkawlh deuh nuaih te pawh an hmu thin. Chutianga an awm hnu lawkah migraine chu a rawn thawk ta thin a ni.
Kum 10 leh 46 inkar ten migraines hi an nei nasa ber niin an sawi a, upat hnuah pawh neih thar theih tho a ni. Mipa aiin hmeichhia ten an nei nasa zawk a, inthlah chhawn theih ni te pawhin an sawi.
Nuin nau a pai laiin migraines hi a thawk khat deuh a, a chhan nithei awma an sawi chu nuin nau a pai laiin hormone progesterone a ngah lai tak a ni, hei hian migraine thawk tur a veng thei niin an sawi. Chutihrualin, migraine nei ngai reng reng lo te pawhin nau an pai lai atangin lu na an nei tan ve thei tho bawk.
Migraine chu damdawi, triptan, ergots leh beta blockers nei ang chi ten a enkawl theih a. Lu na chu luakchhuakin a zui thin chuan luak danna te pawh an chawh tel thin. Migraines chungchanga specialist i rawn duh a nih chuan neurologist lam i rawn a tul dawn a ni.
Damdawi ei aia a prevention lam a pawimawh a, migraines rawn langchhuak tur a tihtlem theih a, a na lutuk tur pawh a tihnep theih niin an sawi. Chumi atan chuan engin nge kan migraine chu rawn ti chhuak thin tih kan hriat a pawimawh a, i lu tina thin tu i hriat tawh chuan i nunphung thlakin, migraines chu i control thei tawh dawn a ni. I lu nat dan chhinchhiah la, a nat nasat dan leh a nat hmaa i thil ei te chhinchhiah rawh. Hei hian i migraine ti chhuaktu leh a pumpelh theih dan a hriattir thei dawn che a ni.
Damdawi hmang lova migraine enkawl dan:
– Niacin pai tam chaw ei hnem rawh, entir nan- wheat, thlaihnah hring, tomato, nuts, nihawi chi, sa thin leh sangha.
– Ser (lemon) kawr rawt diak la, chu chu chalah hnawih rawh. A ro thlengin chiah la, tui sikin i phih fai leh mai dawn nia.
– Carrot juice 300 ml, spinach juice 200 ml, beet emaw fanghma (cucumber) juice 200 ml te chawhpawlh la, in rawh.
Migraine nei tana tih tur leh tih loh tur:
– Boruak lum leh vawt inthlak thleng thut thutna hmunah awm tam loh tur.
– Nitin darkar 6-8 tal mut tum tur a ni a, nitin exercise lak thin tur.
– Analgesic hman rei lutuk loh tur.
– Paracetamol emaw aspirin emaw te hi migraine nachhawk nan a hman thei, mahse, naupang kum 16 hnuailam tan aspirin hi ei loh tur a ni. Nachhawkna chu i lu a na dawn ni a i hriat veleh ei nghal tur a ni.