Minister atanga bang turin MNF-in phut
Minister Dr Vanlaltlana chu chhan hrang hrang vangin a nihna atanga bang turin an phut tih MNF party chuan an sawi.MNF Action & Vigilance Department leh MNF Thalai Hqrs. tangdun chuan Ningani khan Vanapa Hall kawtah punkhawm huaihawtin minister Dr Vanlalthlana ban an phutna aupuiin an phut chhan an sawi.
Dr Vanlalthlana chu a awmna party, ZPM MLA chairman-na hnuaia Assembly Petitions Commitee-in restricted tender hmanga contractor a thlan dan chu eirukna lian leh dik lo a ni tih a finfiah a, cancel an phut angin sawrkarin a cancel sak tih an sawi. A awmna party sawrkar meuh pawhin a dan bawhchhiat tarlanga a thiltih an cancel sak chu, minister ni tlak lo a ni tih tarlanna a ni, tiin, ‘A MLA puite pawhin thup ngaihna awm miah loa a thilsual tih cancel an phut hi Rs. 22,48,00,000 (vbch. 22.48) chuang a ni. Hetiang hlemhletna lian tak titu hi minister atanga bang turin kan phut a ni,’ a ti.
Mizoram State University Bill 2025 Assembly-a sawiho laiin, NEP 2020 angin Lungleiah Mizoram State University-a dah theih loh thu Higher & Technical Education minister Dr Vanlalthlana hian a sawi tih MNF hian sawiin, a thusawi angin bill pawh pass a ni a. Kum khat em pawh a liam hmain cabinet rorel angin Mizoram State University chu Lungleia suan a nih tur thu a puang leh a. Cabinet rorel anga sawn a nih thu a sawi hnu daihah cabinet-in ‘by circulation’ in an pass leh hnuhnawh tih document atangin finfiah a ni tih a sawi.
‘Hengte hian minister Dr Vanlalthlana dawt sawi a lailang chiang a, mipui dawt min hrilh duhtu hi minister ni zui tlakah kan ngai lo,’ an ti.
Minister Dr Vanlalthlana chu a department chanpual hneh loh em avanga Taxation leh I&PR department laksak niin MNF hian an sawi a. ICT department phei chu a bo ta emaw tih mai turin a awm mek tih an sawi.
‘Tunah pawh a department a enkawl danah mit a tlung lo em em a. School Education leh Higher & Technical Education a sawp chhe mek a, siamthat leh harsa khawpa a sawp chhiat hma ngeia minister atanga a ban hi kan phut a. Amah a bang lo a nih pawhin minister atanga ban turin chief minister kan phut a ni,’ an ti.