Minister-in LMC office tlawh

Minister Dr R Lalthangliana chuan Thawhtanni khan Lunglei Municipal Council (LMC) office tlawhin councillor-te leh official-te nen an inkawm a. Minister hi Lunglei HPC vice chairman Lawmawma Tochhawng leh additional DC Donny Lalruatsanga leh official dangten an tawiawm
LMC hi hun rei tawh tak atanga an lo thlir reng leh nghahhlelh em em a ni, tiin, tunah MNF sawrkarin tipuitlingin a taka a function thei ta chu lawmawm a tih thu a sawi a. Municipal Act chu kum 2007-a MNF sawrkarin a pass a ni tih a sawi.
Municipal tih tur hriatchian a pawimawh a, an tihfuh chuan LMC hmang hian Lunglei khawpui chu nasa takin an tihmasawn thei tih Dr R Lalthangliana hian a sawi a. LMC office pawh department dang nena inpawlh nuaia awm a fuh reng lo mah se, thawk leh khatah tih rum rum a harsa tih a sawi a ni.
Elected body an nihna chu a hlutna hriatthiam a ngai tih sawiin, “Tunlai khawvelah chuan kan hnathawh that leh that loh hi miten min thlir reng a ni tih hria ila, state sawrkar sum chauh ni lo, central sawrkar atangin sum tam tak khawpui tihhmasawnna tura chawkluh tur a awm tih hrereng ang u,” a ti.
LMC chairman Lalzuithanga sawi danin, Lunglei khawpui enkawlna kawnga regulations hrang hrang chu uluk takin an duang mek a. Vawiin, June 27 hian LMC Board of Councillors meeting hmasa ber an nei ang. LMC councillor-te hian May khan chief minister leh sawrkar hotu dangte bakah department hrang hrang an tlawh a; karleh hian Administrative Training Institute-ah training an nei dawn a ni. An mawhphurna hrang hrang tha taka hlenchhuak tura theihtawp an chhuah mek thu leh chak zawka hma la turin thawktu an mamawh belh thu minister hnenah hian a lo thlen a ni.