Poshan Maah Campaign chhungin mi 70000 chuang hriselna endik sak

Poshan Maah Campaign chhungin
mi 70000 chuang hriselna endik sak
India ram puma Swasth Nari, Sashakt Parivar Abhiyan leh 8th Rastriya Poshan Maah Campaign neih chhungin Mizoramah chuan mipui 70000 chuang hriselna endik sak a ni a. A thlawna thisen pek beihpui thlakah unit 1700 chuang pek a ni bawk.
Kumin September 17 khan India ram pum tan he campaign hi Prime minister Narendra Modi chuan Madhya Pradesh-ah a hawng a, kar kalta khan khar a ni. A hawnna hi Mizoramah pawh ram chhung hmun dang rual hian neih a ni a, larsap Gen. Vijay Kumar Singh (Retd) chuan state tan a hawng.
A kharna thuchah sawiin Health & Family Welfare minister Lalrinpuii chuan, ram chhung hmundang ruala hmeichhiate hriselna tur campaign pawimawh tak – Swasth Nari Sashakt Parivar leh Poshan Maah Mizorama kalpui a nih danah thawktute thawhrimna leh taimakna a fak tih a sawi a. Campaign hlawhtling taka neih a nih avangin village/ local council, tlawmngai pawl leh kohhran ho thawhpuina leh tanrualnaah pawh a lawm tih a sawi a ni.
National Health Mission Mizoram mission director Dr Lily Chhakchhuak sawi danin, Swasth Nari Sashakt Parivar campaign-in a tum ber chu, chhungkaw nu ber atanga tana hriselna bul tan a ni a. Hemi hnuaiah hian September 17 atanga October 2 chhung khan hmeichhiate hriselna lam hawi campaign kalpui niin, hospital hrang hrang, Health & Welness Centre leh Health Sub-Centre ah health camp leh check-up neih a ni. PMJAY, PMMVY leh Nikshay Mitra enrollment kalpui a ni a, Ayushman Bharat Health Account identity card siam a ni bawk. Naupang vaccine pek, BP sang, zunthlum, hnute cancer, anaemia leh TB vei zawn chhuah bakah AYUSH awareness, ka chhung hriselna leh a thlawna thisen pek beihpui buatsaih a ni bawk. 8th Rastriya Poshan Maah kaltlangin nu leh naupangte hriselna nan hmalakna hrang hrang kalpui a ni.
Campaign chhung hian health camp vawi 4224 neih a ni a, special camp vawih 627 neih a ni. Campaign chhung hian mi 73847 hriselna endik niin, heng zinga 38145 chu hmeichhia an ni. Health camp-a hriselna endik sak dan chu – diabetes – 38424 (mipa 17938 leh hmeichhia 20486); hypertension – 42519 (mipa 18701 leh hmeichhia 23818); oral, breast & cervical cancer – 29180 (mipa 13078 leh hmeichhia 16102); TB – 32423 (mipa 16013 leh hmeichhia 16410); anaemia – 11173 (mipa 3388 leh hmeichhia 7790); nu naupai lai – 7820; Nikshay Mitra-a ziahluh mi 5354 (mipa 2522 leh hmeichhia 2832) an awm.
He campaign chhung hian PMJAY /Vay Vandan Cards (Health Card) mi 1645 hnenah pek chhuah a ni a. Blood Donation Camp hmun hrang hrangah neih niin thisen unit 1753 pek a ni. Campaign-ah hian sawrkar institution ho pawhin health camp hmun an huaihawt a ni.