Minute 1 chhunga lu chunglama washing machine chawi kang ngun ber record siam

Minute 1 chhunga lu chunglama washing machine chawi kang ngun ber record siam
Maltese pachak Tony Farrugia, kum 35, chuan kg 54 a rit washing machine chu a kut pakhat chauh hmangin a lu chunglamah a chawi kang nalh nalh theih a, minute khat chhungin vawi 13 a chawikang hman a, Guinness World Record a siam.
A chak em avanga a hmingah pawh “Tony the Strongman” an tih hial hian he record hi thla kaltaa a siam kha niin, Santa Marija festival an neihna Mosta-a an event buatsaihah hian second 37 chhungin vawi 13 hi a chawi kang hman a, Guinness World Records chuan, “minute khat chhunga washing machine lu chunglama chawi kang ngun thei ber” record title an hlan ta a ni.
Farrugia hian a record siam certificate hi online lamah chuan a dawng tawh a, a original erawh London atanga an thawn hun a nghah a la ngai. Record a siam tih entirna certificate a dawng chu nuam a tih thu sawiin, “An (Guinness) hnen atanga hetiang chanchinthar han dawn chu a nuam duh ve khawp mai. Ka hlim tak zet a ni, a hautak ve bawk, a record siam chauh ni lovin, an duhkhirh em em mai si a, an pawm theih ngei tura an dan zam te kan tihlawhtling thei te hi a lawmawm lehzual a ni. Chubakah Maltese mipui zingah world record siam hi kan la tlem em a ni,” a ti.
Farrugia chuan hetiang record hi la awm ngai lo a nih avangin Guinness lamah hetiang record siam an dilna an lo pawm chu lawmawm a tih thu a sawi a, Guinness lam chuan wahsing machine hi kg 45 aiin a zâng tur a ni lo an ti a, chubakah record siam tur chuan chawlh awm miah lovin vawi sarih tak a zawn zatin lu chunglama chawi kan nalh nalh a ngai bawk a ni.
Farrugia chuan, “Video-a lo record satliah ang maia thil awlsam a ni lo,” tiin witness mumal tak, Guinness lamin an pawm teih bakah expert, a hmuna endiktu Guinness-in an pawm theih leh official timekeeper a neih ngei ngei a ngai a. Farrugia hian police officer leh kangthelh police pahnih te a record siam endiktu atan hian a hmang a, chutah document lam an la duh khirh hle niin a sawi bawk.