Minute khat-a kar-full ngun thei ber

Pakistan hmeichhe naupang kum 12 mi, Fatima Naseem chuan Guinness World Record title pasarih a nei ta. A record thar ber chu minute khat chhunga kar-full ngun thei ber a ni!
Fatima hi martial arts thiam a ni a, a taksa a tithlepin a tifan kual vel thei hle mai a, minute khatah vawi 47 tehreng a kar-full hman a nih chu! A hmaa hetiang record siamtu chu England lam mi Liberty Barros niin, ani hi minute khatah vawi 42 a kar-full hman ve thung.
Fatima Naseem hian Guinness World Record pasarih a siam tling ta a, Pakistani hmeichhe zinga record siam hnem ber a ni ta bawk. Fatima chuan, “Khawvela athlete hriathlawh tak record ka khum tuma beih hi ka tan chona lian tak a ni a, mahse, ka inbuatsaih nasa ve em a ni. He hlawhtlinna hi Pakistan tan ka hlan,” a ti.
A hmaa he record siamtu Liberty Barros hi khawvela hmeichhe taksa thlepa ti ki-kawi-kual vel nasa thei ber (most flexible woman) an tih hial a ni a, America’s Got Talent, Spain’s Got Talent leh Britain’s Got Talent-ah te pawh lo inlan ve zak zak tawh a ni.
Fatima pa Rashid Naseem pawh hi Guinness World Records lama mikhual lo tak niin, Pakistani athlete zinga Guinness World Record siam hnem ber a ni bawk.