Mipa chu rindan tawk neih a ngai

Mipa chu rindan tawk neih a ngai
He survey result thar hi hmeichhe ten an lawm viau mai thei, inngaihzawnna leh nupa nunah hmeichhia aiin mipain dawt sawi an hrat zawk niin an sawi tlat mai. Chuvangin hmeichhe tan mipa thusawi te rindan tawk neih thiam a ngai e, an tih chu!
Mipain dawt a sawi chu a tihsual thup nana a tih emaw, hmeichhe rilru tihnat a hlauh vang emaw, hre lo nih a hreh vang leh hmeichhe laka tlawm nih a hreh vang te pawh a ni thei a, a chhang hrang hrang a awm ang. Relationship lama mithiam ten mipa te thusawia rindan tawk neih ngai ni a an sawi te kan rawn tarlang e.
1. I awm ve reng laiin hmeichhe nalh leh chhe lo tak mai a lo melh ru reng a, han chhuahchhal chhin teh, “Ka en lo reng reng,” tiin tan a khawh ang a, dawtin i puh ti hialin a tang ngam ang, chutiang hmeichhia in bul hnaiah an awm tih pawh a hriat loh thu a sawi ang. Mahse, a thusawi chu rindan tawk nei mai rawh, dik tak chuan a lo thlithlai ru chiang alawm, chu chu mipa zia a ni.
2. “Nangmah chauh ka suangtuah thin che,” a ti em. Amah chauha a awm changa a ngaihtuahna a kal sexy deuh changin nangmah chauh a ngaihtuah che a, a mitthlaah nangmah chauh i awm thin niin a sawi a. Chu chu awih tir che an tum. Mahse, chutiang a ni miah lo, an kawppui te chu ‘reality’ atan a nia, ‘fantasy’ chu a dang daih! Rindan tawk thiam ang che.
3. Gadgets vel hi hre lo lutuk nih an hreh a, an hriat miah loh pawh hria anga lan talh an tum thin. Hmeichhiain a handset chungchangah eng emaw zawt sela hre lo nih hreh a, a hriat loh pawh chhuahlam eng eng emaw siamin, pehhel dan a ngaihtuah ang. Technology lam thilah hmeichhiain thil an zawh te hre lo nih an hreh a, chu chu an intih pâ ve na pakhat a ni.
4. “Engtik lai pawn ka ngaihtuah reng che,” a ti em ni? “Nang ngaihtuah loin nikhat pawh ka awm thei lo,” te a ti em? A teuh lo mai. Dik tak chuan i kal chiah kha thildang a ngaihtuah zui ve nghal mai a nia!
5. In pahniha inawm dun reng laiin lo muthlu se la, “Ka muthlu lo, thil ka ngaihtuah alawm,” tiin tan a khawh viau ang. Hmeichhe bula muthlu nih chu pâ lo riauin an hre tlat.
6. Eng emaw i chah a, mahse, a theihnghilh hlauh mai a. “Ka theihnghilh a lawm,” chu a ti duh miah lo ang. Eng emaw chhuanlam a siam ngei ngei ang.