Mipa fa enkawl danah nu leh pa tan lak a tul – Lalrinpuii

Mipa fa enkawl danah nu leh pa tan lak a tul
– Lalrinpuii
Mipa rintlak leh innghahna tlak an tlem tawh a, mipa fa enkawl danah nu leh pa in tan lak a tul tih Social Welfare minister Lalrinpuii chuan a sawi.
State Hub for Empowerment of Women, Women & Child Development bultumin HSLC leh HSSLC Exam 2025 top 10-a tling hmeichhe zirlaite hnenah Thawhlehni khan lawmpuina pek an ni a. Hmanpuitu Social Welfare, Women & Child Development minister Lalrinpuii chuan tuna hlawhtlinna an chan chu a bul tanna mai a ni tih hrereng a, hlawhtlinna tam zawk leh dinhmun sang zawk la luah chho turin tha thlah loa beih tang tang turin a chah.
Hmeichhia nih avanga indahhniam mai emaw thil tih harsat bik riau tura inngaihna emaw nei mai lo turin a chah a. Hetihrual hian tunlaiah Mizo mipa in hma an sawn a pawimawh hle, tiin, “Mipa rintlak leh innghahna tlak an tlem tawh a. Mipa fa enkawl danah nu leh pa in tan kan lak a tul,” Lalrinpuii hian a ti.
Zirlai hmeichhia tithate hnenah chawimawina thilpek hlanin, sumfai bakah certificate a keng tel.
HSLC-ah hian top 10-a tling an vaiin 24 an ni a, hmeichhia 10 an awm. HSSLC arts-ah top 10-ah 16 langin 9 hmeichhia an ni a, science-ah 15 langin hmeichhia 6, commerce-ah top 10-a lang 10 zinga 5 hmeichhia an ni. Top 10-a hmeichhia lang hi HSLC leh HSSLC ah an vaiin 30 an ni.