Mipa naupangin lehkhabu ziakin record siam

Mipa naupangin lehkhabu ziakin record siam
World record siam hi thil namai a ni lo va, pakhat aia tam phei chu pui tawh tak a ni, chutah, kum nga pawh tlin hmaa record pahnih siam phei chu pui tak a ni ringawt. Chutiang chu UAE mipa naupang, Saeed Rashed AlMeiri thil tawn a ni. He mipa naupang hian kumin March thla kha kum 4 leh ni 218 a upa niin lehkhabu a tlangzarh a, khawvela lehkhabu ziak tlangzarh thei naupang ber record a siam a nih kha. Record siam tur hian an lehkhabu ziah hi bu 1000 tal an hralh ngei a ngai a ni.
Saeed-a lehkhabu ziah hi ‘The Elephant Saeed and the Bear’ tih a ni a, tunah chuan he lehkhabu chhunzawmna, a bu hnihna ‘My True Friend’ tih chu ziak zoin, a tlangzarh leh ta a, khawvela lehkhabu series ziak thei naupang ber record a siam leh ta a ni.
A lehkhabu hmasaah hian sai pakhat tlanga picnic tura kal leh polar bear intawnga inkawmngeih ta chanchin a tarlang a, a bu hnihnaah hian sai-in polar bear chu mangthaa a haw san leh tak dan vel te a tarlang leh a ni.
Saeed hi a u AlDhabi AlMheiri thiltihin a cho phur a, a u pawh hi hmeichhe naupang, kum 8 leh ni 239 a upa a niha lehkhabu tlangzarh thei a ni a, ani hi chuan tawng chi hnih (bilingual)-in lehkhabu series a ziak a, hetiang tithei naupang ber record a lo siam ve tawh bawk a ni. A lehkhabu ziah chu ‘I Had An Idea And Here Was The Begining’ tih a ni a, English leh Arabic-in a ziak a ni.