Vaginal discharge: A pawi em?

Hmeichhe zawng zawngin an tawn vek chu serh atanga bawlhhlawh chhuak hi a ni a, chu chu viginal discharge an ti mai thin. Chutiang bawlhhlawh chhuak zawng zawng chu thil tha lo a ni kher lo thei. Mahse, a rawng a lo danglam emaw, a rim a chhia emaw a nih chuan awm ngaih tih that loh a hun.
Hetianga bawlhhlawh chhuak hi a hrehawmin awm te pawh a tinuam lo thei a, mahse, a pumpelh theih si loh. Hmeichhia zawng zawngin an tawn ve tur reng a ni tlat mai.
Times of India health section-in a tarlan danin hetianga bawlhhlawh chhuak hian tangkaina a nei a- hmeichhe reproductive system tan a pawimawh a, thenfai hna a thawk thin. A bikin thlatin hunbi a lo tawp hian. Uterine leh vaginal tract te tifaiin cell thi leh tuihnang te a paihchhuak a, uterus, cervix leh vagina te a tifai thin.
Eng chin nge normal: Gynaecologist Dr Prachi Kakkar chuan, “Hmeichhe serh atanga bawlhhlawh chhuak tam dan hi a inang lo thei hle a, chuvangin thenkhat tana normal hi midang tan a abnormal a ni thei. Stress, infection, natna eng emaw, antibiotics hman, kum upat lam leh nau pai leh pai loh te hian bawlhhlawh chhuak tam lam a tidanglam thei.
Hmeichhe thenkhat chuan nitin bawlhhlawh chhuak hi an nei thei a, thenkhatah chuan a chang changa chhuak chauh pawh a ni thei. Dr Kakkar chuan, “Bawlhhlawh chhuak chu a var deuh emaw a fim deuh emaw a nih a, rim a neih hran loh a, hnang chhah deuh a nih loh bawk chuan thil pawi a ni lo a, normal anga ngaih thin a ni,” a ti.
Engtikah ngaih tih tha loh tur: Zun kawngah fel lo a awm chuan serh atangin bawlhhlawh a chhuak duh hle niin gynaecologist Kirti Soman chuan a sawi a, “Thawklehkhatah tam tham deuh takin a rawn chhuak thut a ni thei a, chutiang a nih loh pawhin engmah chhuak si loin serh vel chu a khawro viau thei. Hetiang hi a nih chuan ngaih tih that loh a hun tihna a ni,” a ti.
Serh atanga thil chhuak chu a rawng a danglam a- a eng emaw hring deuh emaw a var hnang deuh (dhoi ang deuh) te a nih a, a rim a chhiat bawk chuan infection i nei tihna a ni. Yeast infection emaw, vaginosis emaw, hmeichhiat mipat atanga inkaichhawn chi natna gonorrhoea emaw vang te pawh a ni thei. Heng infection te hi damdawi ei a dam mai thei a nih thu Dr Soman chuan a sawi bawk.
Engtin nge i hriatsatna i hriat theih ang:
1. Thawklehkhata tam deuh taka bawlhhlawh chhuak thut i nei a nih chuan, a rei zawng te chhin chhiah tum ang che. Serh khawro a nih pawhin a rei zawng chhinchhiah tur a ni. Hetiang hi a hmain i lo nei tawh a nih chuan kar khat aia rei nghak loin doctor pan thuai ang che.
2. Bawlhhlawh chhuak chu a rawng a lo danglam a- a eng, a hring deuh, a grey emaw a nih a, a rimchhiat bawk chuan infection vang a ni.
3. Infection hi mipat hmeichhiatna hman atangin pawhin a kai theih.
4. Nupa nun hman laiin a na emaw, serh kua chu a khawro emaw a nih chuan cervix infection vang a ni thei a, doctor pan tur a ni.
5. Doctor rawn loin mahni tawka inenkawl ve ringawt hi a pawi thei a, bazar vela insilfaina te damdawi ang maia lo hman ve ngawt hi a pawi thei. Hetiang kan lo hman ve ngawt hian cell hrisel tha te kan tihlum zawk hlauh thei.
6. Infection thenkhat chu a awm nawn leh thin a, vawi klhat tihdam tawh vangin enkawl nawn leh ngai tawh lo tura inngaih tur a ni lo.