Mipui dah pawimawh hmasak

Kum 2025 atana a enkawl department-te inhlan tharna leh infuih tharna hun hmanpuitu minister Dr Vanlalthlana chuan, sawrkar chu mipui ta a nih angin, sawrkar hnathawkte chu mipui rawngbawltu an ni a, an hnathawhnaah an rawngbawlsak mipui dah pawimawh hmasak nachang hre zel turin a chah a.
Kum a thar hian sawrkar hnathawkte inhlan tharna hun hman a ni thin a, chuta thuchah pawimawh tak ni thin chu, tuna minister thuchah ang hi a ni. Politician-te hian mipui dah pawimawh hmasa turin sawrkar hnathawkte an chahin an fuih thin. Sawrkar hnathawkte pawh hian hetiang fuihna thu hi an dawng malh malh ta hle.
Mipui ngaih pawimawh kawngah, tunhma aiin tun hnuah hian hma kan sawn nasa ta. Tunhma deuh kha chuan, abikin thingtlang khua atanga khawpuia sawrkar office dawr tura lo kalte khan, sawrkar hnathawkte dawr hreawm an tih thu an sawi thin. Thufing pakhat chuan, ‘every society has a black sheep’ a lo ti a, thawktu mihring hei zozai zingah hian tlema mize danglam deuh hi chu an inphumru deuh ngei ngei thin. A huhova thiltih/hnathawhnaah hian, mi pahnih khat fel lohna emaw diklohna emaw hian mifel tam zawkte hming an tichhe thin. Hei hi a pawi em em mai a, hetiang thilah hian hotu zawkten an hnuaia kun hnathawkte dinhmun an zir a, an hriatchian a, formation an rem fel zung zung a, a tul anga reformation pawh kalpui zung zung thei tura an mawhphurhna an hlenchhuah a pawimawh thin a ni.
Sawrkar hnathawkte hian sawrkar hna an thawh chhan ‘mipui rawngbawl’ hi englai pawha an vawn reng a pawimawh hle; mipuite hi an hlawh hmuhna, an ‘source of income’ a ni a, mipuite an dah pawimawh hmasa ber tur tihna a ni. Awmpui nula/tlangval (domestic workers) te hian, anmahni ruaitute hi vin khur khur fo mai se, an tihtur, an mawhphurhna, hlawh an neih chhan hnathawh tur ang pawh thawk tha duh ta mang lo se, a ruaitute tan chuan rawih zui zel a harsa khawp ang. Sawrkar hnathawkte pawh hian rawng an bawlsak mipuite an ngaih pawimawh loh chuan, awmpui nula mahni mawhphurhna hre lo ang khi an ni mai dawn tihna a ni awm e.