Mipui nawr kal chawpa kawng siam an ni
- MNF
Mipui nawr kal chawpa kawng siam an ni
- MNF
ZPM sawrkarin kawngpui chungchanga record a siam dan a chhuanawm loh hle a, tuna kawng an siam chhan pawh mipui nawr kal chawp vang a ni tih MNF party chuan an sawi.
MNF Publicity Board vice chairman J Malsawmzuala Vanchhawng chuan, hriat theih chinah kumin ang em ema Mizoram chak lakna kawngpui pawimawh a chhiat nasat tum leh heti taka mipuiin kan tawrh nasat tum hi kan la tawng ngai lo tih a sawi a. 2023 December, thal lai, hnathawh theih hun lai takin ZPM sawrkar a ding tan a, thal chhung zawng holiday hmangin, 2024 September a thlen meuh chuan tuna buai zualna lai, Kawnpui leh Khamrang inkar a chhiat lutuk avangin lirthei a tlan hleithei lo a. Mizoramah bungrua a lut mumal thei loa, tuialhthei indaih lohna nasa tak a thleng a, hemi kaihhnawih pawl hrang hrangin kawng siamthat phutin lungawi loh an lantir bakah Central YMA pawh chechhuakin, a huna siam tura an ngenna ngaihpawimawh loh vang, tiin an auchhuak hial tih a sawi.
Hetianga kawng chhia avanga harsatna nasa tak kan tawh lai mek hian, 2024 September atang khan ZPM sawrkarin diesel leh petrol atangin kawngpui siamna tur chhiah (cess) a la a, diesel leh petrol-a VAT lak pawh a let deuhthawa tipungin oil man a san chhoh phah tih a sawi bawk.
“Mizoramah fur a nat avangin kawngpui hi thal laiin a theih ang anga cheithat a tul thin. Nikum lamah harsatna nasa tak kan paltlang tawh avangin hnathawh theih lai, thal laia awmze neia hma lak a nih loh chuan kuminah Mizoram chak lakna kawngpui hi a chhe nasa hle dawn tih kan hrethiam lawk a, sawrkar phei chuan a hmu lawk chiang a ni. Kawng siamna tur sum a awm thu leh ruahtui a hul veleh kawng siam tan tum a nih thu 2024 September khan PWD minister Pu Vanlalhlana’n a lo puang tawh a, kawng siamna tura a bik taka tuialhthei atanga ZPM sawrkarin chhiah a lak Road Maintenance Cess tlingkhawm hi tunah Rs. 25,54,57,771.00 a ni tawh bawk. Sum nei reng chung si leh kawng a chhe nasa hle dawn tih hrelawk chung sia sawrkarin thal chhung zawng hmalakna mumal a nei lo hi mipui ngaihpawimawh lohna nasa tak a ni a, chhiah petu mipui tan rin zui a harsa tawh dawn,” J Malsawmzuala hian a ti.
Kawnpui – New Khamrang hi 2024 September-ah sawrkarin contractor bantirin, a security cheng nuai 35.37 a laksak a, contractor kut atanga laksak a nih hnuah pawh thal chhung zawngin engmah ti mumal loin sawrkarin a thlir a, kuminah harsatna namen lo kan tawk nawn leh ta tih a sawi a. Kumin July 7-a NHIDCL-in an lak fel hma zawng kha chuan state sawrkar mawhphurhna a ni tih chu thudik a ni a, mawphurtu dang kawh tur dap phei chu mawhphurhna lak ngam lohna leh a tuartu mipui zah lohna nasa tak a ni tih a sawi a ni.
Khamrang- Sairang inkar chu NHIDCL kuta awm mai tur ni mah se, MNF sawrkar liamta kha chuan a tuartu mipui kan nih avangin mawhphurhnaa la in, khatihlaia chief minister Pu Zoramthanga chuan PWD officer-te hruaiin, sawrkar tirhah hna hmasa berah a neih nghal a. Kum 6 a lo liam leh tawh avang leh thal laia cheithat mumal a hlawh loh avangin a chhe leh nual tawh tih a sawi.
“ZPM sawrkarin kawngpui chungchanga record a siam dan hi a chhuanawm loh hle a. Kum 15 daih kawng siam tura intiamna – ‘ZPM a sawrkar chuan a sawrkar tuk atangin kawng a tha nghal ang’ tia intiamna thawm mipui benga a thangkhawk pawh a reh hmain, ‘hriat theih china kawng chhiat ber tum’ kan tawng mek ta zawk a. Mipuiin harsatna namen lo kan tawh tur hmu lawk reng chung leh kawng siamna tur bik liau liau chhiah sang tak la chung si a, tun ang harsatna nasa taka ZPM sawrkarin min hnuklut hi sawrkar awm chhan nena thil inkalh hlauh a ni a, midang mawhpuh tur dap phei chu chhiah petute zah lohna nasa tak a ni,” MNF Publicity Board vice chairman hian a ti.
“Tuna hna an tan pawh hi mipui nawr kalna avang liau liaua thawk an ni a, lo siamtha ta pawh nise, mipui sum tlingkhawma siam an nih avangin Mizoram sawrkar hian inchhuanna tur pakhatmah an nei lo,” a ti bawk.