Mipui phun thawm kan la hre lo – TBC Lalvenchhunga

Sawrkar kal mekah mipui phun thawm hriat tur ala awm loa, chief minister leh minister faktu chu opposition party an ni tih ZPM MLA TBC Lalvenchhunga chuan a sawi.
Thawhtannia ZPM office-a inkhawmah adviser to chief minister TBC Lalvenchhunga chuan, ZPM a sawrkar khan mipui beiseina chanve tihhlawhtlin a ni, tiin, “Chief minister huaisen kan nei a, opposition-te pawhin sawi nuam an ti. Minister-te inpekna leh thawhrim zia hretute chu mipui kan ni. Eiruk loh kan intiam a, vawiin thlengin kan fihlim. Kan khingpuite hian kan thusawi lak kawih an thiam hle tih bak sawrkar han puihna em em an nei lem lo. Budget vawikhat kan pharh ve ta a, he budget hmang mektu mipui phun thawm a la awm lo hi a lawmawm takzet a ni,” a ti.
Dawmkan ngai dawmkang loa, a kang sa te nen hnungthak inhiahtawn hunlai a liam tawh a, tunah chuan tan tlan a, dik tlan a, a tha zawnga innawrtawn a ngai tih ZPM hruaitu hian sawiin, “Kalphung thar siam tur hian hna hautak thawh a ngai a, dikna hi a lal dawn a nih chuan kan minister-te an dik hmasak a ngai a, mipuiin kan thlawp a ngai bawk. Contract leh supply system fel lo lutuk kha a tuartu chu mipui kan ni a, tunah chuan dik leh felfai zawka kal kan tum dawn a ni,” a ti.
Sawrkar laipui atanga kan chanpual ve tur lokal tam takah fimkhur leh uluk, dik zawka kal a ngai a, tan pawh an la reng tih adviser to CM hian a sawi. State-in project priority mumal a neih a ngai a, hnathawh tur thawk zo si loa kalsan a tam avangin project tharin a tawrh phah mek tih a sawi bawk. Cheng vaibelchhe 5 chin project, term khat chhunga thawh zawh a awm mumal thin loh avangin hengte hi an tawrh phah a. Vbch. 500 man Aizawl Smart City chu kum 10 chhungin an thawk zo hman lo niin a sawi.
“Tunah fur a lo thleng a, Vanapa Hall kawt chu tui a tling cham put reng a, he scheme lah hi a tawp daih tawh lehnghal,” a ti. Dik lo tih tir tumte huat an pawisa dawn loa, an thil neih leh lakluh atangin an eiruk leh ruk loh chu a chiang mai dawn tih a sawi a ni.