Mipuiin AMC tangkai zia an ve sawi hun nghakhlel

Aizawl Municipal Corporation chu mipui phurrtir siamtu leh niawma ngai loa, a tangkaina leh hlutna an sawi hun a nghahhlelhawm tih corporator kalchhuak tur Christina Roluahpuii Sailo chuan a sawi.
Zirtawpnia ZPM office-a inkhawmah ZPM corporator Christina Roluahpuii Sailo chuan, AMC inthlanah ZPM-in sawrkarna a chang a nih chuan Aizawl mipui tan ro an rel dawn tih a sawi a. AMC chu contract thawh tur semtu ringawta mipuiin an ngaih mai a hlauhawm tih a sawi.
“Roreltu kan nih ve ngam tak tak a ngai. Mipui tan phurrit siamtu niloa, mipuiin AMC awm hi a ninawm ti loin, AMC pawimawh zia, tangkai zia leh hlutzia an sawi hun a nghahhlelhawm,” a ti.
AMC Playground Bawngkawn suasam a nih dan chuan rilru a ti na tih a sawi a. Hetiang thil hi ZPM kaihhruai AMC sawrkar a piang a nih chuan an remti ve tur a ni lo tih a sawi. Aizawl Municipal-a sawrkar mekin ro an rel tha kan tiin, kan lungawi tawk em tih inzawt a, thlak an duh a nih chuan ZPM candidate-te vote turin mipui a sawm tih a sawi bawk.
Corporator a nih anga hna a thawh dan sawiin, “Langtlang takin Ward Fund hi Ward Committee kaltlangin kan rel a. Property Tax Return chauh ni lo, Ward Fund zawng zawng kan rel. Mipui tam zawkin an chhawr theih tur zawngin kan thawk thin. Kan hnathawh dawnah YMA chanchinbuah estimate nen hnathawh tur hrilhhriat thin a ni a. Sawrkar kum a zawh zelah ward fund hmanna hi ward chhung chhungkaw tinah kan sem thin,” a ti.