Sawrkar kum kal mekah MIFCO-in nuai 14 a hlep

Sawrkar kum kal mekah Mizoram Food & Allied Industries Corporation Limited (MIFCO) chuan cheng nuai 14 a hlep.
MIFCO Board of Directors hi Zirtawpni khan an chairman Lalthazuala Rawite hoin an thu a. Statutory Audit Report thlirhoin, M/s Krishna K & Co. Chartered Accountant, Tuikhuahtlang chu kum 2022- 2023, 2023- 2024 leh 2024- 2025 chhunga MIFCO accounts statutory auditor atan Comptroller & Accounts General of India chuan a ruat a, an ni hian MIFCO accounts kum thum chhung an audit zawh hnuah report an buatsaih chu thutkhawmah hian pharhin pawmpui a ni.
Statutory report-a a lan danin, 2025- 2026 kumah MIFCO chuan cheng nuai 14 hlep a nei a. MIFCO Recruitment Rules hman mek, kum 1993 atanga hman tawh chu siamthat turin pawm a ni.
MIFCO chairman chuan, kumin hian sapthei tui leh lakhuihthei tui sawr bakah serthlum tui sawr an tum a; baibing leh rawtuai tin hralhchhuah tur khawp siam an tum bawk tih a sawi. Zinmite tan engemaw harsatna an tawh pawha riah theihna tur mikhual room chu Chhingchhip-a MIFCO hmunah siam a ni tawh tih a sawi a ni.
Kuminah sapthei kg ah Rs.45 leh lakhuihthei kg. ah Rs.18-in an lei dawn tih a sawi a. Tun atanga hun reiloteah sapthei leh lakhuihthei tui chu dawra zawrhchhuaha in nghal mai theih (ready to serve) tura siam mek a ni tih a sawi.