Miss Mizoran 2024 open audition vawiinah nei dawn

Miss Mizoram 2024 Open Audition chu vawiin hian HYVE City Hall-ah neih a ni dawn a, audition atanga round danga kal zel tura thlan te leh district hrang hranga ‘District Miss Mizoram’ thlan ten final round an lut dawn a ni. Aizawl tih loh district hrang hrangah district aiawh turin ‘Miss’ thlan niin, district thenkhatah chuan an tlang fel tawh a, Aizawl bikah hian open audition neih a ni dawn a, hetah hi chuan a duh apiang tel theih a ni thung a, audition round atanga thlan chuah te chu district hrang hranga ‘Miss’ thlante nen finalist an ni ang.
Miss Mizoram 2024 hi Zonet leh MJA thawk dunin ‘Miss Mizoram’ an thlan vawi li-na tur a ni tawh a, hun hmasa lamah Miss Mizoram thlan a lo ni fo tawh a, MJA-in vawi nga tlang tawhin, Lelte magazine-in tum li vel an lo thlang tawh bawk a ni. Kumin hian open audition round-ah mi 13 vel inlan tur an awm a, judge ten final round-a inlan tur engzat nge an thlan chhuah dawn tih erawh a hriat loh.
Miss Mizoram 2024-ah hian sub title hrang hrang – BWAP, Miss Beautiful Skin, People’s Choice, Miss Congeniality, Miss Personality, Miss Talented, Miss Active, Miss Body Beautiful, Miss Photogenic, Miss Ramp Walk te pawh awm tura ruahman a ni bawk. ‘Peoples Choice’ bik hi social media kaltlanga mipui thlan tur a ni ang.