Miss Universe India 2025 Top 20-ah Evelyn Zachhingpuii
Miss Universe India 2025 Top 20-ah
Evelyn Zachhingpuii
Miss Universe India 2025-ah Mizoram aiawhin Saikhamakawn nula Evelyn Zachhingpuii telin, contestant 50 awmnaah Top 20 a inhlangkai thei. Evelyn hi Miss Mizoram 2024-ah khan first runner up a lo ni tawh bawk. Evelyn hi nizan khan Jaipur a Mizo awm ten zanriah an kilpui a, August ni 21-ah Aizawl a pan leh tawh dawn a ni.
Miss Universe India hi an thlan vawi hnihna niin, nikum atang khan he pageant hi an kalpui tan a, nikum khan Mizoram atangin Roneihpuii telin, mipui vote hmanga thlan, Miss Popular a nih avangin direct-in Top 20 a lo kai tawh a, kuminah Evelyn hi Miss Popular-ah thlang tling zo ta lo mah ila Top 20 a inhlangkai thei ta tho a, tihian tum hnih kan tel tawhah top 20 kan la thleng ve ve tihna a ni.
Evelyn chuan a thlen chinah lawmawm a tih thu sawiin, “Kan tum ram ang chu thleng zo ta lo mah ila lawmna hlirin ka khat a ni. Hmun hrang hrang a Zofaten inlungrual takin min lo support tih ka hriat hian ka thinlung a khawih lutuk. Intihsiak lai khan phone te kan khawih vak hman lo a, mahse, ka thiante leh chhungten min lo hrilh thin a, ka inthlahrung lek lek zawk. Ka thinlung takin lawmthu ka sawi a ni,” a ti.
Evelyn chuan pageantry lamah Mizo nula ten theihna kan nei tih sawiin, “Hma kan la sawn zel thei, kan in-support that phawt chuan Mizo nula te hian theihna kan nei tha,” a ti. Hetihrual hian state pawn lama hetiang intihsiaknaa tel tur chuan sum leh pai lamah pawh dinhmun tlema insiam sak theih pawimawh dawna a hriat thu sawiin, “Kan ram hi kan la hausa lutuk lo a, sponsorship te chu han nei ve bawk mah ila mahni insenso a ngai nasa thin a. Sponsorship hi nei tha phei ila chuan Mizo nula ten theihtawp chhuahin, national mai ni lo, international level pawh kan thlir ve thei ang,” a ti bawk.
Hetihrual hian India hmarchhak lama cheng ten tlema enhran deuhna kan tawng thin niawma sawi chungchangah Evelyn chuan, “Tunhma te ang em em chu a ni tawh lo ang a, a ziaawm tawh khawp mai, mahse, awm lo tawp chu a ni lo ang, han ngaihbel theih deuh tur te chu a aw awm ve,” a ti bawk.