Mission Organic Mizoram hmalaknaah sapthei telh ve

Mission Organic Mizoram hnuaia chemical tel loa thlai/ theia hma lak meknaah chief minister duhdanin sapthei telh thar tum a ni tih Agriculture & Farmers Welfare minister PC Vanlalruata chuan a sawi.
Mission Organic Mizoram (MOM) leh Clover Organic Pvt. Ltd. bultum, Mission Organic Value Chain Development for North Eastern Region (MOVCD- NER) kaltlanga Khawzawl district-a lakhuihthei chingtu intelkhawm pawl – Tuichangral Organic Farmer Producer Company Ltd. lakhuithei thar zawrh chhuah runpui ‘Pineap Bonanza 2024’ chu Ningani khan Aizawlah Agriculture & Farmers Welfare minister hian a hawng a. Mizoramah kum 2016 atangin MOM kalpui a ni a, farmer producer company (FPC) hnuaiah loneitu 500 tal awm tura ruahman niin, MOM kaltlanga hmalak mekna – Mizo hmarchate, sawhthing, aieng, thingpuife leh lakhuihthei bakah Mizoram thar sapthei chu a danglam bik avang leh India ramah ching an tam loh avangin CM duhdanin telh belh tum a ni tih a sawi.
Sawrkar tharin agriculture marketing a ngaihpawimawh avangin Directorate of Agriculture-ah Marketing Wing changtlung zawk din tura hma lak a ni tih a sawi a. Mission organic lama thanharh chuan market tha zawkah min hruai thleng thei dawn tih a sawi a ni.

8 MOVCD- NER hi state lead agency – MOM, Directorate of Agriculture enkawl niin, Mizoramah FPC 30 ziahluh an ni tawh.
8 FPC tin hian thlai thlan bik – Mizo hmarchate (Bird’s Eye Chilli), sawhthing, aieng, thingpuife leh lakhuihthei an nei.
8 Tuichangral FPC hi Khawzawl district-a lakhuihthei ching mi 500 intelkhawm an ni a. Lakhuihthei chingtu khaw 8 – Chalrang, New Chalrang, Vangtlang, Khawhai, Sialhawk, Tlangmawi, Tlangpui leh Lungtan an tel.
8 Pineapple Bonanza hi August 2022 atanga neih tan niin, tun hi a tum thumna a ni a, July 26 thleng a awh ang. Hemi hun chhung hian lakhuithei metric tonne riat (8) tal hralh chhuah theih beisei a ni.