Union MoS-in Vety College a tlawh

College of Veterinary Sciences & Animal Husbandry (CVSc& AH), Central Agricultural University (CAU), Selesih-a Teaching Veterinary Clinical Complex (TVCC) leh Department of Veterinary Microbiology chu Union minister of state for Agriculture and Farmers Welfare Bhagirath Choudhary chuan Ningani khan a tlawh a. College-in a sak thar Sales Booth leh he college-in kum 25 a tlin hriatrenga – Silver Jubliee lungphun a hawn bakah exhibition buatsaih a tlawh a; loneitute leh ran vulhtute nen an inkawm bawk.
Union MoS hnrenah hian department head Prof. Fazal Ali Ahmed chuan Vety college-in ran dam lo enkawlna a kalpui dan a sawifiah a. Department of Veterinary Microbiology a tlawhna faculty Prof. Tapan Kumar Dutta chuan ran natna hrang hrang chhuichhuahna atana project an khawih tawh leh an khawih mek hrilhfiahin a enpui. Department of Livestock Production Technology hnuaia sak thar sales booth atang hian sa leh bawnghnute atanga tharchhuah ei tur thianghlim leh hrisel tak tak college hian a hralh a ni.
Loneitute leh ran vulhtute chu ngaihpawimawh an nih thu leh kum 2029 ah chuan an thla tin lakluh hi a let 4-a pung tura hmalakna kalpui mek a nih thu Bhagirath Choudhary hian a sawi a. An thlai leh sa tharchhuah a hralhna lam ngaipawimawh a tul, tiin, farmer’s producer organisation chu thu mai ni loin a taka kalpui turin a chah.
Union MoS for Agriculture & Farmers Welfare hian Nilaini chawhnu khan Mizoram lo thlengin Lengpui Airport-ah Agriculture & Farmers Welfare minister PC Vanlalruata, secretary Ramdinliani leh sawrkar official dangten an lo dawngsawng a. Ruahman dan chuan program hrang hrang a hman zawh hnuah vawiin hian New Delhi-ah a kir dawn a ni.